निक साइमन इन्स्टिच्युट (NSI) का सदस्यहरूलाई पर्साको पटेर्वा सुगौली गाउँपालिकाले स्वागत गरेको छ ।
गाउँपालिकामा आयोजित स्वागत कार्यक्रममा गाउँपालिका अध्यक्ष दिनेश चौधरी, उपाध्यक्ष ममता महतोसहित गाउँपालिकाका जनप्रतिनिधि, स्वास्थ्य स्वयंसेविका, स्थानीय अगुवा तथा समाजसेवी, स्वास्थ्य चौकीका इन्चार्ज र निचुटा सामुदायिक आँखा केन्द्र, तिलगंगाका प्रतिनिधिहरूको सहभागिता रहेको थियो ।
कार्यक्रममा NSI का सदस्यहरूलाई स्वागत गर्दै गाउँपालिका अध्यक्ष चौधरीले स्वास्थ्य क्षेत्रमा स्थानीय तह र विभिन्न स्वास्थ्य संस्थाबीचको सहकार्यले समुदायमा गुणस्तरीय स्वास्थ्य सेवा विस्तार गर्न महत्वपूर्ण भूमिका खेल्ने बताउनुभयो ।
उहाँले स्वास्थ्य सेवाको पहुँच विस्तार तथा स्थानीय नागरिकलाई प्रभावकारी सेवा उपलब्ध गराउन विभिन्न स्वास्थ्य संस्थासँगको सहकार्य आवश्यक रहेको बताउनुभयो ।
NSI को सहकार्यमा स्वास्थ्य क्षेत्रमा सञ्चालन हुने विभिन्न कार्यक्रमबाट स्थानीय नागरिकले प्रत्यक्ष लाभ लिन सक्ने अपेक्षा गरिएको छ। कार्यक्रममा सहभागीहरूले गाउँपालिकाको स्वास्थ्य सेवा थप प्रभावकारी र पहुँचयोग्य बनाउन यस्ता सहकार्यलाई निरन्तरता दिनुपर्नेमा जोड दिएका थिए ।
स्वागत कार्यक्रममा स्वास्थ्य क्षेत्रसँग सम्बन्धित विषयमा छलफल गर्नुका साथै आगामी दिनमा गर्न सकिने सहकार्यका सम्भावनाबारे समेत छलफल भएको गाउँपालिकाले जनाएको छ ।
