अमेरिका–इरानबीच जारी युद्धका कारण विश्व बजारमा इन्धन आपूर्तिमा असर परेसँगै पेट्रोलियम पदार्थको मूल्य बढेको छ । महँगो इन्धन र बढ्दो महँगीको विरोधमा विभिन्न देशमा प्रदर्शन तथा हडताल सुरु भएका छन् ।
सिरियामा इन्धनको मूल्य करिब ४० प्रतिशत बढेपछि प्रदर्शनकारीले सडक अवरुद्ध गरेका छन् । ग्वाटेमालामा ट्रक चालक तथा विभिन्न समूहले राजमार्ग बन्द गर्दै मूल्य नियन्त्रणको माग गरेका छन् ।
यस्तै, पोर्चुगलमा व्यवसायी र श्रमिकले प्रदर्शन गरेका छन् भने फ्रान्समा माछा व्यवसायीले इन्धन डिपो अवरुद्ध गरेका छन् । फिलिपिन्समा यातायात मजदुरले इन्धनमा अनुदान र पेट्रोलियम पदार्थमा लगाइएको कर हटाउन माग गर्दै हडताल गरेका छन् ।
अन्तर्राष्ट्रिय बजारमा कच्चा तेलको मूल्य प्रतिब्यारेल १०० अमेरिकी डलरभन्दा माथि पुगेपछि महँगो इन्धनको असर यातायात, व्यापार, उद्योग तथा घरपरिवारको दैनिक खर्चमा परेको छ । विभिन्न देशमा बढ्दो जीवनयापन खर्चसँगै सरकारमाथि राहत तथा मूल्य नियन्त्रणका लागि दबाब बढिरहेको छ ।
