गृह, सञ्चार तथा कानून मन्त्रालयले प्रदेशमा हुनसक्ने भारी वर्षा, बाढी, पहिरो, डुबान तथा अन्य सम्भावित विपद्को जोखिमलाई ध्यानमा राख्दै उच्च सतर्कता अपनाउन आग्रह गरेको छ ।
प्रदेश विपद् व्यवस्थापन कार्यकारी समितिको बिहीबार बिहान बसेको बैठकको निर्णय तथा राष्ट्रिय विपद् जोखिम न्यूनीकरण तथा व्यवस्थापन प्राधिकरणको सूचना र सतर्कताका आधारमा प्रदेश सरकारले विपद् पूर्वतयारी तथा प्रतिकार्यका लागि आवश्यक व्यवस्था मिलाउँदै उच्च सतर्कता अपनाउन आग्रह गरेको हो ।
मन्त्रालयका अनुसार सम्भावित विपद्का समयमा आवश्यक पर्ने खाद्यान्न, दैनिक उपभोग्य वस्तु, औषधि तथा उद्धार सामग्रीको पूर्वव्यवस्था गरी तत्काल परिचालन गर्न सक्ने अवस्थामा राखिएको छ । सुरक्षा निकायलाई समेत उच्च सतर्कताका साथ तयारी अवस्थामा राखिएको र आवश्यकता अनुसार उद्धार तथा सुरक्षा कार्यमा परिचालन गर्ने व्यवस्था मिलाइएको मन्त्रालयले जनाएको छ ।
साथै, जोखिमयुक्त क्षेत्रमा रहेका ज्येष्ठ नागरिक, बालबालिका, महिला, अपाङ्गता भएका व्यक्ति लगायत जोखिममा रहेका समूहको सुरक्षालाई प्राथमिकतामा राख्दै आवश्यक परे उनीहरूलाई सुरक्षित स्थानमा स्थानान्तरण गर्ने व्यवस्था गरिएको छ । विपद्सम्बन्धी सूचना, सावधानी तथा सुरक्षाका उपायबारे नियमित सूचना प्रवाह गरिने मन्त्रालयले जनाएको छ ।
त्यस्तै, स्वास्थ्य, विद्युत् र सञ्चारजस्ता अत्यावश्यक सेवा अवरुद्ध हुन नदिन सम्बन्धित निकायबीच समन्वय र सहकार्य कायम गरिएको मन्त्रालयको भनाइ छ ।
मन्त्री फकिरा महतोले सम्भावित विपद्को अवस्थामा नागरिकलाई आवश्यक सावधानी अपनाउन, जोखिमयुक्त स्थानमा नजान तथा आधिकारिक सूचना र सुरक्षासम्बन्धी सन्देशमा ध्यान दिन आग्रह गर्नुभएको छ । उहाँले प्रदेशका सबै स्थानीय तहसँग समन्वय गरी स्थानीयस्तरमा पूर्वतयारी, उद्धार, राहत तथा प्रतिकार्यलाई प्रभावकारी बनाउने व्यवस्था मिलाइएको जानकारी दिनुभयो ।
मन्त्री महतोले ‘सतर्क रहौँ, सुरक्षित रहौँ’ भन्ने सन्देशसहित विपद्को जोखिम न्यूनीकरणमा सबै पक्षलाई सहयोग गर्न आग्रह गर्नुभएको छ ।
