नेपाली महावाणिज्यदूतावास, दुबईले नयाँ बनेर आएका नेपाली राहदानी (पासपोर्ट) सेवाग्राहीको घरमै डेलिभरी गर्ने व्यवस्था सुरु गरेको छ ।
महावाणिज्यदूतावासले शुक्रबार सूचना जारी गर्दै अब नयाँ राहदानी इमिरेट्स पोस्टमार्फत सम्बन्धित आवेदकले उपलब्ध गराएको ठेगानामा पठाउने व्यवस्था गरिएको जनाएको हो ।
राहदानी लिनकै लागि कार्यालयमा उपस्थित हुनुपर्ने, त्यसका लागि बिदा मिलाउनुपर्ने, समय तथा यात्रा खर्च लाग्ने भएकाले सेवाग्राहीबाट लामो समयदेखि हुलाकमार्फत राहदानी उपलब्ध गराउन माग हुँदै आएको महावाणिज्यदूतावासले जनाएको छ ।
नयाँ व्यवस्थाअनुसार महावाणिज्यदूतावासबाट राहदानीका लागि आवेदन दिने सेवाग्राहीले बायोमेट्रिक विवरण दिने समयमा नै राहदानी डेलिभरीसम्बन्धी फाराम भरेर बुझाउनुपर्नेछ। राहदानी तयार भएर दुबई आएपछि महावाणिज्यदूतावासले डेलिभरीका लागि इमिरेट्स पोस्टलाई उपलब्ध गराउनेछ ।
राहदानी घरमै प्राप्त गर्न चाहने सेवाग्राहीले डेलिभरीका क्रममा इमिरेट्स पोस्टलाई शुल्क बुझाउनुपर्नेछ। डेलिभरी शुल्क १५ दिराम तथा भ्याटसहित कुल १५.७५ दिराम लाग्ने महावाणिज्यदूतावासले जनाएको छ ।
महावाणिज्यदूतावासका अनुसार घरमै राहदानी प्राप्त गर्ने यो सेवा स्वैच्छिक हो। कार्यालयबाटै राहदानी लिन चाहने सेवाग्राहीले नियमित प्रक्रियाअनुसार राहदानी लिन सक्नेछन् ।
नयाँ व्यवस्थाले राहदानी लिन महावाणिज्यदूतावाससम्म पुग्नुपर्ने बाध्यता कम गर्नुका साथै समय र यात्रामा लाग्ने खर्च बचत हुने अपेक्षा गरिएको छ ।
