सर्लाहीमा शनिबार मध्यरातिदेखि अविरल वर्षा भएकाले सदरमुकाम मलङ्गवासहित विभिन्न भू–भाग जलमग्न बनेको छ ।
भारी वर्षाका कारण जनजीवन प्रभावित बनेको छ । सदरमुकाम मलङ्गवाका अधिकांश क्षेत्रमा वर्षात्को पानी जमेर जलमग्न भएको स्थानीय वासिन्दा शिवचन्द्र चौधरीले जानकारी दिनुभयो ।
मलङ्गवास्थित नेपाल विद्युत प्राधिकरणको सवस्टेशन डुबानमा पर्दा सदरमुकामसहित जिल्लाको दक्षिणी भेगका १० भन्दा बढी पालिकामा आइतबार बिहानैदेखि विद्युत अवरुद्ध बनेको छ । भारी वर्षापछि जिल्लाको पूर्वी भेगस्थित हरिपूर्वासहितको क्षेत्रमा घरहरूमा पानी पसेको स्थानीय मुकेश झाले जानकारी दिनुभयो ।
निरन्तर पानी परिरहँदा बागमती, लखन्देहीलगायतका खोलामा बाढी बढेको छ । लालबन्दी नगरपालिका–१४, नारायणखोलाका शिक्षक कर्ण घिसिङले आइतबार बिहानदेखि लखन्देहीमा बाढी बढिरहेको उहाँले जानकारी दिनुभयो ।
ठुलो पानी पर्दा कच्ची घरहरू भत्कन थालेका छन् । अविरल वर्षापछि चन्द्रनगर गाउँपालिका–१, किसनपुरमा आइतबार बिहान रोहित पासवानको घर भत्किएपछि तत्कालै त्रिपालसहितका राहत सामग्री प्रदान गरिएको गाउँपालिका अध्यक्ष राजकुमार महतोले जानकारी दिनुभयो ।
वर्षाले पाक्न लागेको धान बाली, तरकारीलगायतका बालीमा क्षति गरेपछि किसान चिन्तित बनेका छन् । लालबन्दी नगरपालिका–१५, रुन्चे बजारका विवेक बम्जनले शनिबार मध्यरातिदेखि भारी वर्षाका कारण पाक्न लागेको धान बालीमा व्यापक क्षति पुगेको बताउनुभयो ।
निरन्तर वर्षा भइरहेकाले बागमती नदीसहितका खोलाहरूमा बाढी बढ्ने र डुबानको समस्या आइपर्न सक्ने भएकाले उच्च सतर्कता अपनाइएको सर्लाहीका प्रमुख जिल्ला अधिकारी विजयराज सुवेदीले बताउनुभयो । उहाँका अनुसार सर्लाहीमा बुधबार साँझदेखि शुक्रबार रातिसम्म निरन्तर झरी परेर शनिबार दिनभर मौसम सफा भएको थियो ।
शनिबार मध्यरातिदेखि पुनः भारी वर्षा सुरु भएपछि जनजीवन कष्टकर बनेको छ । आइतबार मध्यान्हसम्म निरन्तर ठुलो पानी परिरहेकाले अत्यावश्यक काम परेर बाहिर निस्कनुपर्नेहरु प्रभावित बनेका छन् ।
