हङकङ सिक्सेस क्रिकेट प्रतियोगिताको आगामी संस्करणमा नेपालले सहभागिता नजनाउने भएको छ। प्रतियोगिता आयोजकले सोमबार सामाजिक सञ्जालमार्फत सहभागी टोलीहरूको सूची सार्वजनिक गर्दा नेपाल त्यसमा परेको छैन ।
आयोजकले सार्वजनिक गरेको सूचीअनुसार प्रतियोगितामा भारत, श्रीलंका, हङकङ, ओमान, स्कटल्यान्ड, बंगलादेश, पाकिस्तान, अस्ट्रेलिया, अफगानिस्तान, इंग्ल्यान्ड, दक्षिण अफ्रिका र यूएई सहभागी हुनेछन् ।
हङकङ सिक्सेस अक्टोबर ३० देखि नोभेम्बर १ सम्म आयोजना हुँदैछ। सोही समयमा नेपाल प्रिमियर लिग (एनपीएल) सञ्चालन हुने भएकाले नेपालले हङकङ सिक्सेसमा सहभागिता नजनाउने भएको हो। एनपीएल अक्टोबर २६ देखि सुरु हुँदैछ ।
हङकङ सिक्सेसमा प्रत्येक इनिङ्स ६ ओभरको हुन्छ भने एक टोलीबाट ६ खेलाडी मैदानमा उत्रिन्छन्। विकेटकिपरबाहेक सबै खेलाडीले बलिङ गर्नुपर्ने नियम रहेको छ। एक बलरले बढीमा दुई ओभर मात्र बलिङ गर्न पाउँछन् ।
त्यस्तै, कुनै ब्याटरले ५० रन पूरा गरेपछि स्वतः रिटायर्ड हुनुपर्ने नियम छ। अन्य विकेट गइसकेपछि भने रिटायर्ड भएका ब्याटर पुनः मैदानमा आएर ब्याटिङ गर्न सक्छन् ।
यसअघि नेपालले हङकङ सिक्सेसमा सहभागिता जनाउँदै आएको थियो ।
