२०औँ एसियन गेम्सअन्तर्गत पुरुष क्रिकेटको नेपाल र श्रीलंकाबीचको क्वार्टरफाइनल खेल वर्षाका कारण रद्द भएको छ। खेल रद्द भएसँगै आईसीसी वरियताका आधारमा श्रीलंका सेमिफाइनलमा प्रवेश गरेको छ ।
समूह चरणमा उत्कृष्ट प्रदर्शन गर्दै क्वार्टरफाइनल पुगेको नेपालको एसियन गेम्स यात्रा भने खेल नै खेल्न नपाई क्वार्टरफाइनलबाट समाप्त भएको हो ।
श्रीलंकाले अब सेमिफाइनलमा भारतसँग प्रतिस्पर्धा गर्नेछ। एसियन गेम्समा आईसीसी वरियताका आधारमा भारत, श्रीलंका, बंगलादेश र पाकिस्तानले सिधै क्वार्टरफाइनलमा स्थान बनाएका थिए ।
यसअघि सोमबार भएका दुवै क्वार्टरफाइनल खेल पनि वर्षाका कारण रद्द भएका थिए। त्यससँगै आईसीसी वरियताका आधारमा भारत र पाकिस्तान सेमिफाइनलमा पुगेका थिए ।
क्वार्टरफाइनलको अन्तिम खेलमा मलेसियाले बंगलादेशसँग प्रतिस्पर्धा गर्ने तालिका छ। उक्त खेल नेपाली समयअनुसार बिहान १०ः४५ बजे सुरु हुनेछ। वर्षाका कारण खेल रद्द भएमा आईसीसी वरियताका आधारमा बंगलादेश सेमिफाइनलमा पुग्नेछ ।
