नेपालका लागि भारतीय राजदूत नवीन श्रीवास्तवले आफ्नो कार्यकाल पूरा गरी स्वदेश फर्किनुअघि प्रधानमन्त्री बालेन्द्र शाहसँग बिदाइ भेट गरेका छन् ।
श्रीवास्तवले मंगलबार सिंहदरबारस्थित प्रधानमन्त्री तथा मन्त्रिपरिषद्को कार्यालय पुगेर प्रधानमन्त्री शाहसँग भेटवार्ता गरेका हुन्। उनी सन् २०२२ मा नेपालका लागि भारतीय राजदूतका रूपमा जिम्मेवारी सम्हाल्न आएका थिए र कार्यकाल पूरा भएपछि भारत फर्किने तयारीमा छन् ।
भेटका क्रममा प्रधानमन्त्री शाहले नेपाल र भारतबीचको सम्बन्ध लामो समयदेखि सुमधुर र बहुआयामिक रहँदै आएको उल्लेख गर्दै आगामी दिनमा पनि आपसी सहकार्य निरन्तर रहने विश्वास व्यक्त गरे ।
प्रधानमन्त्री शाहले हालैका बाढीपहिरो तथा विपद्का समयमा भारत सरकारले उपलब्ध गराएको सहयोगप्रति धन्यवाद व्यक्त गर्दै राजदूत श्रीवास्तवलाई कार्यकाल सफलतापूर्वक सम्पन्न गरेकोमा बधाई तथा आगामी दिनका लागि शुभकामना दिए ।
भेटमा राजदूत श्रीवास्तवले आफ्नो कार्यकालमा नेपाल र भारतबीच विभिन्न विकास तथा सहकार्यका क्षेत्रमा भएका प्रगतिबारे चर्चा गरेका थिए। उनले नेपालमा रहँदा प्राप्त सहयोग र सद्भावका लागि नेपाल सरकार तथा नेपाली जनताप्रति आभार व्यक्त गरे ।
श्रीवास्तवको कार्यकालमा नेपाल–भारतबीच उच्चस्तरीय भ्रमण तथा द्विपक्षीय सहकार्यका विभिन्न विषयमा संवाद अघि बढेको थियो ।
