टिकटकमा फर्निचर बिक्रीको आकर्षक विज्ञापन राखेर ग्राहकलाई सम्पर्क गर्ने, मोबाइलको स्क्रिन सेयर गराई बैंकिङ विवरण हात पार्ने र खाताबाट रकम निकाल्ने गरेको आरोपमा रौतहट प्रहरीले चार जनालाई पक्राउ गरेको छ ।
घटनाको अनुसन्धानका क्रममा प्रहरीले थप दुई जनालाई पक्राउ गरेपछि आरोपीको संख्या चार पुगेको हो। पक्राउ पर्नेमा कटहरिया नगरपालिका–३ बिर्ती प्रस्टोकाका रामप्रवेश साह बनिया र सुबोध माली भगत छन् ।
यसअघि प्रहरीले सोही ठाउँका २० वर्षीय सुरजप्रसाद यादव र २२ वर्षीय भोलिन्द्रकुमार यादवलाई पक्राउ गरेको थियो। उनीहरूलाई गत भदौ १६ गते पक्राउ गरी अनुसन्धानका लागि इलाका प्रहरी कार्यालय गरुडामा पठाइएको थियो। उनीहरूमाथि भदौ १७ गते अनलाइन ठगीसम्बन्धी मुद्दा दर्ता गरिएको थियो ।
इलाका प्रहरी कार्यालय गरुडाका प्रमुख डीएसपी शंकरप्रसाद आचार्यका अनुसार पक्राउ परेकाहरूको बयान तथा अनुसन्धानबाट प्राप्त सूचनाका आधारमा थप दुई जनालाई नियन्त्रणमा लिइएको हो ।
फर्निचर किन्न खोज्दा स्क्रिन सेयर गर्न लगाएर ठगी
प्रहरीका अनुसार गत भदौको दोस्रो साता सिरहाको नवराजपुर गाउँपालिका–३ का ४५ वर्षीय वैद्यनाथकुमार यादवलाई टिकटकमार्फत फर्निचर बिक्री गर्ने भन्दै सम्पर्क गरिएको थियो ।
फर्निचर खरिदका विषयमा कुराकानी गर्ने क्रममा उनलाई मोबाइलको स्क्रिन सेयर गर्न लगाइएको र सोही क्रममा मोबाइल बैंकिङसम्बन्धी गोप्य विवरण प्राप्त गरिएको प्रहरीको अनुसन्धानबाट खुलेको छ ।
त्यसपछि पीडितको बैंक खाताबाट ४७ हजार १९८ रुपैयाँ निकालिएको प्रहरीको भनाइ छ ।
आफ्नो खाताबाट रकम निकालेपछि पीडितले बैंक कारोबारसँग सम्बन्धित विवरणका आधारमा घटनाबारे जानकारी संकलन गरी भदौ १६ गते इलाका प्रहरी कार्यालय कटहरियामा उजुरी दिएका थिए।
उजुरीपछि अनुसन्धान थालेको प्रहरीले सुरजप्रसाद यादव र भोलिन्द्रकुमार यादवलाई पक्राउ गरेको थियो। उनीहरूको बयान र अनुसन्धानका क्रममा खुलेका तथ्यका आधारमा रामप्रवेश साह बनिया र सुबोध माली भगतलाई समेत पक्राउ गरिएको प्रहरीले जनाएको छ ।
नक्कली कागजातबाट बैंक खाता खोलेको आरोप
प्रहरीका अनुसार पक्राउ परेकाहरूले फर्निचर बिक्रीको बहानामा मात्रै नभई विभिन्न माध्यमबाट अनलाइन ठगी गर्ने गरेको प्रारम्भिक अनुसन्धानबाट खुलेको छ ।
उनीहरूले नक्कली नागरिकता र राहदानी प्रयोग गरी बैंक खाता खोल्ने तथा त्यस्ता खातालाई ठगीबाट प्राप्त रकमको कारोबारमा प्रयोग गर्ने गरेको समेत अनुसन्धानबाट खुलेको डीएसपी आचार्यले बताएका छन् ।
घटनामा पक्राउ परेकाहरूको संलग्नता र उनीहरूले प्रयोग गरेका बैंक खाता तथा डिजिटल कारोबारबारे प्रहरीले थप अनुसन्धान गरिरहेको छ। घटनामा अन्य व्यक्तिको समेत संलग्नता हुनसक्ने आशंकामा अनुसन्धान अघि बढाइएको प्रहरीले जनाएको छ।
हाल चारै जना इलाका प्रहरी कार्यालय गरुडाको नियन्त्रणमा छन्। प्रहरीले उनीहरूसँग जोडिएका अन्य व्यक्ति, बैंक खाता, डिजिटल कारोबार र सम्भावित अन्य ठगीका घटनाबारे समेत अनुसन्धान गरिरहेको जनाएको छ ।
