महोत्तरीमा प्रचण्ड गर्मी र वर्षासँगै सर्पदंशका घटना बढेका छन्। बर्दिवास नगरपालिका–३ गौरीडाँडास्थित सर्पदंश उपचार केन्द्रमा असोज सुरु भएयता ६० जना सर्पदंशका बिरामी उपचारका लागि पुगेका छन् ।
असोज सङ्क्रान्तिदेखि लगातारको गर्मी, त्यसपछि चार दिनसम्मको वर्षा र पुनः बढेको तापक्रमका कारण सर्पदंशका घटना बढेको उपचारमा संलग्न स्वास्थ्य प्राविधिकहरूले बताएका छन् ।
गर्मीमा शीतल ठाउँ खोज्दै र वर्षाका बेला दुलोमा पानी पसेपछि सर्प बाहिर निस्कने भएकाले यस समयमा सर्पदंशका घटना बढ्ने गरेको नेपाली सेनाका स्वास्थ्य प्राविधिक टोलीका इन्चार्ज किङ्काङ चौधरीले बताउनुभयो ।
सर्पदंश उपचार केन्द्रमा अहिले शय्या बिरामीले भरिएका छन्। केन्द्रको उपचार सेवा नेपाली सेनाका चार जना स्वास्थ्य प्राविधिकले सञ्चालन गरिरहेका छन्। तर केन्द्रमा दक्ष चिकित्सक र आवश्यक उपचार उपकरणको अभाव रहेको सञ्चालक समितिले जनाएको छ ।
केन्द्रका सञ्चालक समितिका अध्यक्ष कृष्णप्रसाद देवकोटाका अनुसार एन्टिस्नेक भेनमको अभावसमेत पटक–पटक हुने गरेको छ। गत भदौको अन्तिमतिर औषधि अभाव भएपछि केन्द्रले उपचार सेवा बन्द भएको सूचना टाँस गर्नुपरेको थियो। स्वास्थ्य सेवा विभागबाट औषधि उपलब्ध भएपछि असोज २ गतेदेखि सेवा पुनः सञ्चालन गरिएको थियो ।
केन्द्रमा भेन्टिलेटरसहितको सुविधा र दक्ष चिकित्सक पर्याप्त नभएकाले गम्भीर अवस्थाका बिरामीलाई प्रादेशिक अस्पताल जनकपुरधाम वा अन्य सुविधासम्पन्न अस्पतालमा रेफर गर्ने गरिएको केन्द्रका सचिव ध्रुव विष्टले बताउनुभयो ।
केन्द्रमा दक्ष चिकित्सकको आवश्यकता रहेको विषयमा बर्दिवास नगरपालिकाका नगरप्रमुख प्रह्लादकुमार क्षेत्री पनि जानकार रहेको बताउनुभएको छ। उहाँले सर्पदंश उपचार केन्द्र सञ्चालक समितिसँग समन्वय गरी चिकित्सकको व्यवस्थापनका लागि पहल गर्ने बताउनुभयो ।
समुदायस्तरको पहलमा २०७१ साल साउन ३१ गते स्थापना भएको उक्त केन्द्रले हालसम्म ३३ हजारभन्दा बढी सर्पदंशका बिरामीको उपचार गरिसकेको अभिलेखमा उल्लेख छ। महोत्तरीसहित धनुषा, सर्लाही, सिन्धुली, उदयपुर, ओखलढुङ्गा र रामेछापका बिरामीसमेत यहाँ उपचारका लागि आउने गरेका छन् ।
