दुबईबाट इजरायलको तेल अभिभतर्फ उडेको फ्लाईदुबईको विमानमा उडानकै क्रममा पाइलटहरूबीच गम्भीर झडप भएपछि विमानलाई साउदी अरेबियातर्फ मोडेर आकस्मिक अवतरण गराइएको छ ।
फ्लाईदुबईको उडान एफजेड १०७३ ले उडानका क्रममा आपत्कालीन संकेत पठाएपछि घटनाबारे सुरक्षा निकायहरू सतर्क भएका थिए। विमानमा पाइलटहरूबीच भएको शारीरिक झडपका कारण अवस्था असामान्य बनेको र विमान केही समय तीव्र गतिमा तल झरेको विवरण सार्वजनिक भएको छ ।
फ्लाइट ट्र्याकिङ विवरणअनुसार विमानले सामान्य आपत्कालीन संकेत ‘७७००’ पठाएपछि केही समयका लागि गैरकानुनी हस्तक्षेप वा सम्भावित अपहरण जनाउने ‘७५००’ कोडसमेत प्रसारण गरेको थियो। त्यसपछि विमानको दिशा परिवर्तन गरी साउदी अरेबियाको ताबुकतर्फ लगिएको थियो ।
घटनाको क्रममा विमान तीव्र रूपमा तल झरेको बताइएको छ। पछि चालक दलले विमानलाई नियन्त्रणमा लिएर ताबुकस्थित विमानस्थलमा सुरक्षित अवतरण गराएका थिए। विमानमा रहेका सबै यात्रु सुरक्षित रहेको रिपोर्टहरूमा उल्लेख छ।
घटनापछि इजरायली पक्षले विमानको अवस्थाबारे सुरक्षा परामर्श गरेको थियो। प्रारम्भिक रूपमा सम्भावित अपहरणको आशंका गरिए पनि पछिल्ला विवरणमा घटनाको कारण पाइलटहरूबीचको झडप रहेको र यसलाई अपहरणका रूपमा पुष्टि नगरिएको इजरायली अधिकारीलाई उद्धृत गर्दै च्भगतभचक ले जनाएको छ ।
यद्यपि, विमानभित्र चक्कु प्रहार भएको तथा विमानलाई जानाजान दुर्घटनातर्फ लैजान खोजिएको दाबीसहित विभिन्न विवरण सार्वजनिक भएका छन्। यी विषयमा अनुसन्धान जारी रहेकाले घटनाको वास्तविक कारण र उद्देश्यबारे अन्तिम निष्कर्ष आउन बाँकी छ ।
फ्लाईदुबईले भने विमानमा ‘घटना’ भएको र विमान सुरक्षित रूपमा अवतरण गरेको पुष्टि गरेको छ। घटनाबारे थप अनुसन्धान भइरहेको छ ।
