नेपाल राष्ट्र बैंकले यस वर्षको दसैंलाई लक्षित गरेर छुट्टै मिति तोकेर नयाँ नोट वितरण नगर्ने भएको छ ।
केन्द्रीय बैंकले नियमित कार्यालय समयमै बजारको मागअनुसार नयाँ तथा खुद्रा नोट सटही सुविधा उपलब्ध गराउने भएको हो । राष्ट्र बैंकका कार्यकारी निर्देशक अनुज दाहालका अनुसार यस वर्षदेखि दसैंका लागि नयाँ तथा खुद्रा नोट सटहीको छुट्टै सूचना जारी गर्ने अभ्यास हटाइएको छ ।
‘दसैंका बेला नयाँ तथा खुद्रा नोट सटही सुविधा उपलब्ध हुने मिति तोक्ने अभ्यास हटाएका छौं,’ दाहालले भने, ‘यसपालिदेखि केन्द्रीय बैंकको नियमित कामअन्तर्गत नै नयाँ तथा खुद्रा नोट सटही सेवा उपलब्ध हुन्छ ।’
दसैंका बेला नोटको माग बढी हुने भएकाले विगतमा नयाँ नोट बजारमा पठाउने गरिएको थियो । तर, यस वर्ष कुनै विशेष जात वा धर्मको चाडलाई लक्षित नगरी बजारको मागअनुसार नियमित रूपमा नोट सटही सेवा उपलब्ध गराउने नीति राष्ट्र बैंकले लिएको दाहालले बताए ।
‘केन्द्रीय बैंकसँग पर्याप्त नोट छ, मागअनुसार सटही सुविधा दिन्छौं,’ उनले भने, ‘नयाँ नोटले पुग्दासम्म नयाँ वितरण गर्छौं, त्यसले पनि पुगेन भने सुकिला नोट वितरण गर्ने योजना छ ।’राष्ट्र बैंकको बैंकिङ काउन्टरबाट कार्यालय समयमा नोट सटही सेवा उपलब्ध हुँदै आएको छ। बैंक तथा वित्तीय संस्थाहरूले पनि पर्याप्त नयाँ तथा खुद्रा नोट लगिसकेकाले आफ्ना ग्राहकलाई वितरण गरिरहेको राष्ट्र बैंकले जनाएको छ।
प्राकृतिक विपत्तिका कारण यस वर्ष धेरै सर्वसाधारणका लागि दसैं विगतजस्तो उत्सवमय नभएकाले पनि छुट्टै सूचना जारी गरेर नयाँ नोट वितरण नगर्ने निर्णय गरिएको दाहालले बताए । उनका अनुसार हाल राष्ट्र बैंकमा नोट सटही गर्न जाने व्यक्तिले बढीमा दुई बन्डलसम्म नोट साट्न पाउनेछन्। एक बन्डलमा ५, १०, २०, ५० र १०० रुपैयाँ दरका नोट १–१ सय थान रहनेछन् ।
राष्ट्र बैंकका अनुसार व्यक्तिगत प्रयोजनका लागि नयाँ नोट उपलब्ध नहुन सक्छ। व्यापारिक प्रयोजनका लागि भने नयाँ तथा सुकिला नोट सटही सुविधा उपलब्ध गराइँदै आएको छ ।
भिडियाे रिपाेर्ट
