पर्साको धोविनी र जगरनाथपुर गाउँपालिकामा ‘समावेशी शिक्षा र सुरक्षित विद्यालय’ विषयक वक्तृत्वकला प्रतियोगिता सम्पन्न भएको छ । विद्यार्थीमा समावेशी शिक्षा, बालअधिकार र सुरक्षित विद्यालयबारे चेतना अभिवृद्धि गर्ने उद्देश्यले प्रतियोगिता आयोजना गरिएको हो ।
अकाउन्टेबिलिटी ल्याब नेपालको सहयोग तथा सामाजिक संस्था जिल्ला समन्वय समिति (एसओडीसीसी) पर्साको आयोजना र सहकार्यमा धोविनी गाउँपालिकास्थित श्री अजिज मियाँ माध्यमिक विद्यालय र जगरनाथपुर गाउँपालिकास्थित श्री नेपाल राष्ट्रिय माध्यमिक विद्यालय, संठीमा प्रतियोगिता सञ्चालन गरिएको थियो ।
धोविनी गाउँपालिकामा आयोजित प्रतियोगितामा रामशरण पटेल प्रथम, अब्दुल अन्सारी द्वितीय र नौसाद आलम तृतीय भएका छन् । कार्यक्रममा शिक्षक, अभिभावक र विद्यार्थीसहित करिब १२० जनाको सहभागिता रहेको थियो ।
त्यस्तै, जगरनाथपुर गाउँपालिकामा भएको प्रतियोगितामा श्री नेपाल राष्ट्रिय माध्यमिक विद्यालय, संठीकी काजल कुमारी प्रथम, श्री नेपाल राष्ट्रिय माध्यमिक विद्यालय, मसिहानीका राजकुमार साह द्वितीय र संठीकै सेस्नी कुमारी तृतीय भएका छन् । नौसाद आलम र अञ्जली कुमारीले सान्त्वना पुरस्कार प्राप्त गरेका छन् । उक्त कार्यक्रममा शिक्षक, अभिभावक र विद्यार्थीसहित करिब १३५ जनाको सहभागिता रहेको आयोजकले जनाएको छ ।
प्रतियोगितामा सहभागी विद्यार्थीहरूले विद्यालयमा हुने विभेदको अन्त्य, सबै बालबालिकाको समान सहभागिता, बालमैत्री वातावरण र समान शैक्षिक अवसरको आवश्यकताबारे आफ्ना विचार राखेका थिए । उनीहरूले सुरक्षित विद्यालय भन्नाले भवन र भौतिक संरचनाको सुरक्षा मात्र नभई बालबालिकाले डर, हिंसा र भेदभावबिना पढ्न पाउने वातावरण पनि भएको बताएका थिए ।
बालबालिकाको अधिकार र सुरक्षित वातावरण सुनिश्चित गर्न स्थानीय सरकार, विद्यालय, शिक्षक, अभिभावक, समुदाय र विद्यार्थीबीच सहकार्य आवश्यक रहेकोमा सहभागीहरूले जोड दिएका थिए ।
आयोजकका अनुसार यस्ता कार्यक्रमले विद्यार्थीलाई आफ्ना विचार सार्वजनिक रूपमा प्रस्तुत गर्ने अवसर प्रदान गर्नुका साथै समावेशी शिक्षा, बालअधिकार र सुरक्षित विद्यालयबारे समुदायमा समेत सचेतना अभिवृद्धि गर्न सहयोग पुर्याउनेछ ।
