पर्साको जगरनाथपुर गाउँपालिका–३ बिजबनियास्थित श्री नेपाल राष्ट्रिय आधारभूत विद्यालय सञ्चालनमा आएको करिब ९ वर्ष बितिसक्दा पनि विद्यालय भवन तथा परिसरको उचित संरक्षण हुन सकेको छैन ।
विद्यार्थी अध्ययन गर्ने भवन र विद्यालय परिसर नै गाई, भैंसी तथा बाख्रा बाँध्ने र चराउने स्थानका रूपमा प्रयोग भइरहेको पाइएको छ । विद्यालय सञ्चालनमा आएको लामो समय बितिसक्दा पनि आवश्यक भौतिक व्यवस्थापन, संरक्षण तथा नियमित अनुगमनमा सम्बन्धित निकायले पर्याप्त ध्यान नदिएको स्थानीयको गुनासो छ । विद्यालय परिसरमै पशु बाँध्ने तथा राख्ने गरिएको भन्दै उनीहरूले यसले विद्यालयको शैक्षिक वातावरणमा समेत असर पारिरहेको बताएका छन् ।
विद्यालयजस्तो संवेदनशील स्थानमा गाईभैंसी तथा बाख्रा राखिँदा फोहोर तथा दुर्गन्ध फैलिनुका साथै विद्यार्थीको स्वास्थ्य र सरसफाइमा समेत असर पर्न सक्ने स्थानीयको भनाइ छ । पशुका कारण विद्यालय परिसरमा विद्यार्थीलाई सुरक्षित रूपमा आवतजावत गर्नसमेत समस्या हुने गरेको उनीहरू बताउँछन् ।
स्थानीयका अनुसार विद्यालय बालबालिकाको सिकाइ र विकासको केन्द्र हुनुपर्ने भए पनि भवन तथा परिसर नै पशु बाँध्ने र चराउने स्थानका रूपमा प्रयोग हुनु विद्यालय व्यवस्थापन तथा सम्बन्धित स्थानीय तहको निगरानीमाथि प्रश्न खडा गर्ने विषय हो ।
विद्यालयमा अध्ययनरत बालबालिकालाई स्वच्छ, सुरक्षित र मर्यादित वातावरण उपलब्ध गराउनु सम्बन्धित निकायको जिम्मेवारी भए पनि बिजबनियाको विद्यालयमा त्यसको प्रभावकारी कार्यान्वयन हुन नसकेको स्थानीयको गुनासो छ ।
भिडियाे रिपाेर्ट
