रौतहट । रौतहटको सदरमुकाम गौरसँग सीमा जोडिएको भारतको बिहारस्थित सीतामढी जिल्लाको बैरगनिया प्रखण्डमा धान खेतमा बिछ्याइएको खुला विद्युतीय तारबाट करेन्ट लागेर तीन जनाको मृत्यु भएको छ ।
बैरगनिया प्रखण्डअन्तर्गत अख्ता पश्चिमी चकवा पञ्चायत–५ स्थित तकिया टोलमा शनिबार बिहान भएको घटनामा तीन स्थानीयवासीको घटनास्थलमै मृत्यु भएको हो। करेन्ट लागेर अन्य तीन जना गम्भीर घाइते भएका छन् । घाइतेहरूको स्थानीय अस्पतालमा उपचार भइरहेको बताइएको छ।
घटनास्थलमा दुई वटा जंगली बँदेलसमेत मृत अवस्थामा फेला परेका छन् । प्रारम्भिक विवरणअनुसार धानबालीलाई जंगली जनावरबाट जोगाउन खेतमा खुला विद्युतीय तार बिछ्याइएको हुन सक्ने आशंका गरिएको छ ।
भैंसी खोज्ने क्रममा केही स्थानीय खेततर्फ पुगेका बेला विद्युतीय तारको सम्पर्कमा आएपछि दुर्घटना भएको बताइएको छ। खेतमा विद्युतीय तार बिछ्याइएकोबारे उनीहरूलाई जानकारी नभएका कारण घटना भएको प्रारम्भिक जानकारी आएको छ ।
घटनाबारे स्थानीय प्रशासन तथा प्रहरीले थप अनुसन्धान गरिरहेको जनाइएको छ । खेतबारीमा जंगली जनावर नियन्त्रणका लागि खुला विद्युतीय तार प्रयोग गर्दा मानव जीवनसमेत जोखिममा पर्ने भएकाले घटनाले सीमावर्ती क्षेत्रमा सुरक्षाको विषयलाई समेत गम्भीर बनाएको छ ।
