बारा । जितिया पर्वको अवसरमा पोखरीमा नुहाउने क्रममा डुबेर बाराको देवताल गाउँपालिका–६ मा दुई किशोरीको मृत्यु भएको छ ।
स्थानीय पोखरीमा नुहाउन पुगेका राजेश पटेलकी १५ वर्षीया छोरी चाँदनी पटेल र भोला पटेलकी १६ वर्षीया छोरी निशा पटेलको डुबेर मृत्यु भएको जिल्ला प्रहरी कार्यालय बाराले जनाएको छ ।
पोखरीमा दुवै किशोरी डुबेको खबर पाएपछि स्थानीयवासीले तत्काल उद्धार गरी उपचारका लागि अस्पताल पुर्याएका थिए। तर, अस्पताल पुर्याएलगत्तै चिकित्सकले दुवैलाई मृत घोषणा गरेका थिए ।
प्रहरीका अनुसार मृतक दुवै किशोरीको शव पोस्टमार्टमका लागि प्रादेशिक अस्पताल कलैयामा राखिएको छ। घटनाबारे थप अनुसन्धान भइरहेको प्रहरीले जनाएको छ ।
जितिया पर्वको अवसरमा धार्मिक तथा सांस्कृतिक गतिविधिमा सहभागी भइरहेका बेला भएको यस दुःखद घटनाले देवताल गाउँपालिका–६ सहित स्थानीय समुदायमा शोक छाएको छ ।
