म्याद गुज्रिसकेका खाद्य सामग्रीमा नयाँ मिति राखेर नक्कली ब्रान्डको लेबल प्रयोग गरी बजारमा बिक्री–वितरण गरेको आरोपमा प्रहरीले दुई जनालाई पक्राउ गरेको छ ।
पक्राउ पर्नेमा बारा प्रसौनी गाउँपालिका–१ घर भई हाल काठमाडौंको चन्द्रागिरि नगरपालिका–१५, तिनथानामा बस्दै आएका ४० वर्षीय विजेन्द्र साह र पर्साका ४९ वर्षीय अखिलेश प्रसाद कलवार रहेका छन् ।
चन्द्रागिरि–१५ तिनथानास्थित सिद्धि विनायक खाद्य स्टोरमा म्याद सकिएका खाद्य सामग्रीमा नयाँ मिति राखेर पुनः बजारमा पठाउने गरिएको सूचनापछि जिल्ला प्रहरी परिसर काठमाडौं र खाद्य प्रविधि तथा गुण नियन्त्रण विभागको संयुक्त टोलीले मंगलबार अनुगमन गरेको थियो ।
अनुगमनका क्रममा म्याद गुज्रिएका तथा मिति उल्लेख नभएका विभिन्न खाद्य सामग्रीमा पुनः लेबलिङ र मिति राख्ने काम भइरहेको अवस्थामा साह र कलवारलाई नियन्त्रणमा लिइएको प्रहरीले जनाएको छ ।
प्रहरीका अनुसार घटनास्थलबाट म्याद गुज्रिएका काजु, पेस्ता, बदाम (एल्मण्ड), कालो भटमास, मकै, हरियो केराउलगायतका खाद्य सामग्री फेला परेका छन् ।
त्यसैगरी, पुरानो मिति हटाएर नयाँ मिति छाप्न प्रयोग हुने मेसिन, बोरा सिलाउने मेसिन, नक्कली स्टिकर, ल्यापटप र प्रिन्टरसमेत प्रहरीले बरामद गरेको छ ।
बरामद सामग्री र घटनामा संलग्न व्यक्तिमाथि थप अनुसन्धान भइरहेको जिल्ला प्रहरी परिसर काठमाडौंले जनाएको छ। प्रहरीले म्याद गुज्रिएका खाद्य सामग्रीमा नयाँ मिति राखेर उपभोक्तामाझ पठाउने कार्य भएको हुनसक्ने भएकाले घटनालाई खाद्य सुरक्षा र उपभोक्ता हितसँग जोडेर अनुसन्धान अघि बढाएको छ ।
