नेपाल राष्ट्र बैंकले एक रुपैयाँ दरका ४० करोड थान सिक्का उत्पादन तथा आपूर्तिका लागि अन्तर्राष्ट्रिय बोलपत्र आह्वान गरेको छ। राष्ट्र बैंकको मुद्रा व्यवस्थापन विभागले सिक्काको डिजाइन, उत्पादन, आपूर्ति र ढुवानीको जिम्मेवारीका लागि बोलपत्र मागेको हो ।
राष्ट्र बैंकले आइतबार सार्वजनिक गरेको सूचनाअनुसार यसअघि योग्यताका आधारमा छनोट भएका अन्तर्राष्ट्रिय सुरक्षा मुद्रण तथा सिक्का उत्पादन कम्पनीहरूले बोलपत्र प्रक्रियामा सहभागी हुन पाउनेछन् ।
बोलपत्र प्रक्रियाका लागि प्राविधिक र वित्तीय प्रस्ताव छुट्टाछुट्टै खाममा पेस गर्नुपर्ने व्यवस्था गरिएको छ। सिक्का उत्पादन तथा आपूर्तिको ठेक्का अन्तर्राष्ट्रिय प्रतिस्पर्धात्मक प्रक्रियाबाट एक चरणमा अघि बढाइने राष्ट्र बैंकले जनाएको छ ।
यसअघि योग्य कम्पनीको सूचीमा चीनको चाइना बैंक नोट प्रिन्टिङ एन्ड मिन्टिङ कर्पोरेसन, बेलायतको डी ला रुई इन्टरनेसनल, जर्मनीको गिसिके एन्ड डेभ्रियन्ट करेन्सी टेक्नोलोजी, रुसको जोइन्ट स्टक कम्पनी, फ्रान्सको ओबर्थर फिड्युसेयर एसएएस र पोल्याण्डको पोलिस सेक्युरिटिज प्रिन्टिङ रहेका छन् ।
बोलपत्रसम्बन्धी कागजात राष्ट्र बैंकको मुद्रा व्यवस्थापन विभाग, थापाथली तथा टक्सार महाशाखा, बबरमहलबाट लिन सकिनेछ। कागजातका लागि २० हजार रुपैयाँ दस्तुर तोकिएको छ ।
बोलपत्र प्रक्रियाअघि अक्टोबर १५ गते दिउँसो १२ बजे राष्ट्र बैंकको मुद्रा व्यवस्थापन विभागमा पूर्वबोलपत्र बैठक आयोजना हुने भएको छ। इच्छुक कम्पनीले नोभेम्बर ३ गते दिउँसो १२ बजेसम्म बोलपत्र पेस गर्नुपर्नेछ ।
राष्ट्र बैंकका अनुसार सोही दिन दिउँसो १ बजे बोलपत्र खोलिनेछ। बोलपत्र पेस गर्ने कम्पनीले न्यूनतम १ लाख ४८ हजार अमेरिकी डलर बराबरको धरौटीसमेत राख्नुपर्नेछ ।
बोलपत्रको मान्य अवधि १२० दिन तोकिएको छ भने धरौटीको मान्य अवधि बोलपत्रको मान्य अवधि सकिएको मितिपछि थप ३० दिन रहनेछ ।
राष्ट्र बैंकले आवश्यकताअनुसार प्राप्त बोलपत्रमध्ये कुनै एक, सबै वा केही भाग स्वीकार गर्न सक्ने जनाएको छ। त्यस्तै, बोलपत्र पूर्ण वा आंशिक रूपमा स्वीकार वा अस्वीकार गर्ने अधिकारसमेत राष्ट्र बैंकमा रहने सूचनामा उल्लेख छ ।
