उद्योग, वाणिज्य तथा आपूर्तिमन्त्री दीपककुमार साहले ग्यास तथा पेट्रोलियम पदार्थको आपूर्ति अन्तर्राष्ट्रिय परिस्थितिमा निर्भर रहेकाले नेपालले स्वदेशी ऊर्जा स्रोतको प्रयोग बढाउनुपर्ने बताएका छन् ।
सोमबार प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा सांसदहरूले उठाएका इन्धन आपूर्तिसम्बन्धी प्रश्नको जवाफ दिँदै मन्त्री साहले अन्तर्राष्ट्रिय भू–राजनीतिक तनावका कारण इन्धनको मूल्य र आपूर्तिमा उतारचढाव आउने गरेको बताए ।
रुस–युक्रेन युद्ध तथा मध्यपूर्वमा बढिरहेको तनावले विश्व बजारमा इन्धन आपूर्तिमा असर परेको उल्लेख गर्दै उनले यस्ता अन्तर्राष्ट्रिय घटनाबाट उत्पन्न हुने अवरोध नेपालको प्रत्यक्ष नियन्त्रणमा नरहेको स्पष्ट पारे ।
मन्त्री साहले इन्धनमा रहेको बाह्य निर्भरता कम गर्न विद्युत्, ब्रिकेट तथा अन्य जैविक ऊर्जाको प्रयोग बढाउनुपर्नेमा जोड दिए । ग्यासको विकल्पमा स्वदेशमै उत्पादन हुने ऊर्जा प्रयोग गर्ने संस्कृतिको विकास गर्नुपर्ने उनको भनाइ थियो।
उनले इन्धन आयातमा ठूलो रकम विदेशिने गरेको भन्दै स्वदेशी उत्पादन र ऊर्जाको प्रयोग बढाउन सञ्चारमाध्यम तथा नागरिकस्तरबाट समेत अभियान चलाउनुपर्ने बताए ।
आयातित चामलको विकल्पमा रैथाने खाद्यान्न
मन्त्री साहले खाद्यान्नमा समेत आयातमाथिको निर्भरता घटाउन स्थानीय तथा रैथाने बालीको उत्पादन र उपभोग बढाउनुपर्ने बताए। मकै, फापर, सिमी तथा अन्य स्थानीय उत्पादनलाई प्राथमिकता दिए आयातित चामलमाथिको निर्भरता कम गर्न सकिने उनको भनाइ थियो ।
उनले ऊर्जा र खाद्यान्नमा आत्मनिर्भरता बढाउन सरकार, निजी क्षेत्र र नागरिक सबैले आ–आफ्नो भूमिकाबाट योगदान गर्नुपर्ने बताए ।
यसैगरी उद्योग तथा व्यापार विस्तारमा देखिएका कानुनी, प्रशासनिक र प्रक्रियागत अवरोध हटाउन सरकार प्रतिबद्ध रहेको मन्त्री साहले दाबी गरे। कानुन वा प्रक्रिया बाधक भए सुधार गर्ने र भ्रष्टाचार तथा अनावश्यक प्रशासनिक हस्तक्षेपमा शून्य सहनशीलता अपनाउने उनले बताए।
नेपालमा औद्योगिक सम्भावना पर्याप्त रहेको उल्लेख गर्दै मन्त्री साहले युवा जनशक्ति, प्राकृतिक स्रोत, जलविद्युत्, कृषि तथा भारत–चीनबीचको रणनीतिक भौगोलिक अवस्थालाई आर्थिक विकासमा उपयोग गर्नुपर्ने बताए।
उनका अनुसार नीति, पुँजी, प्रविधि, सीप र सुशासनलाई एउटै दिशामा अघि बढाउँदै सरकार, संसद्, निजी क्षेत्र, श्रमिक, उपभोक्ता तथा विज्ञबीच सहकार्य आवश्यक छ।
