चैत ५ गते हुने स्वतन्त्र विद्यार्थी युनियन (स्ववियु) निर्वाचनका लागि वीरगंजस्थित ठाकुरराम बहुमुखी क्याम्पसमा ३४ वटा विद्यार्थी संघ/संगठन दर्ता भएका छन् । देशभरका क्याम्पसहरूमा सोमबार अपराह्न ३ बजेसम्म संघ/संगठन दर्ता गराउने समय तोकिएको थियो ।
प्रमुख निर्वाचन अधिकृत दिलीप सिंहका अनुसार नेपाली विद्यार्थी संघ (नेविसंघ), अखिल (क्रान्तिकारी), अनेरास्ववियु, समाजवादी विद्यार्थी युनियन नेपाल, जनमत विद्यार्थी संघ लगायत ३४ वटा संघ/संगठनले दर्ता गराएका छन् ।
१२ हजारभन्दा बढी मतदाता, निर्वाचन कार्यतालिका सार्वजनिक
प्रमुख निर्वाचन अधिकृत सिंहले ठाकुरराम क्याम्पसमा हुने स्ववियु निर्वाचनमा करिब १२ हजार मतदाता रहेको जानकारी दिए। निर्वाचन कार्यतालिका अनुसार:
- फागुन २१ गते – प्रारम्भिक मतदाता नामावली सार्वजनिक
- फागुन २५ गते – मतदाता सूचीमाथि दाबी–विरोध गर्ने अन्तिम दिन
- फागुन २६ गते – उम्मेदवार मनोनयन पत्र वितरण
- फागुन २७ गते – प्रत्यक्ष र समानुपातिक उम्मेदवारहरूको मनोनयन पत्र दाखिला
- फागुन २८ गते – उम्मेदवारमाथि दाबी–विरोध, छानबिन र अन्तिम सूची प्रकाशन
- फागुन २९ गते – उम्मेदवारी फिर्ताको अन्तिम समय र अन्तिम सूची प्रकाशन
- चैत ५ गते – बिहान ८ बजेदेखि अपराह्न ४ बजेसम्म मतदान
चुनावका लागि तयारी तीव्र, प्रतिस्पर्धा रोचक हुने संकेत
ठाकुरराम क्याम्पस वीरगन्जकै सबैभन्दा ठूलो क्याम्पस भएकाले यहाँ हुने स्ववियु निर्वाचन राजनीतिक रूपमा निकै महत्त्वपूर्ण मानिन्छ । प्रमुख विद्यार्थी संगठनहरूबीच कडा प्रतिस्पर्धा हुने देखिएको छ ।
यसअघिकाे निर्वाचनमा मुख्य प्रतिस्पर्धा नेविसंघ, अनेरास्ववियु, अखिल (क्रान्तिकारी) र समाजवादी विद्यार्थी युनियनबीच देखिएको थियो । यस पटक नयाँ संगठनहरूको सहभागिता पनि देखिएकाले प्रतिस्पर्धा झनै रोचक बन्ने संकेत देखिएको छ ।
