पर्साको पर्सागढी नगरपालिकामा सञ्चालन गरिएको निःशुल्क आँखा परीक्षण तथा उपचार शिविरमा २ हजार २१८ जनाको आँखा परीक्षण गरिएको छ । परीक्षणका क्रममा ५४३ जनामा मोतियाबिन्दु पहिचान भएको नगरपालिकाले जनाएको छ ।
नगरपालिकाले निजगढ तिलगंगा सामुदायिक आँखा अस्पतालसँगको सहकार्यमा असोज ३ गतेदेखि १७ गतेसम्म नगरपालिकाका ९ वटै वडाका १२ स्थानमा शिविर सञ्चालन गरेको थियो । शिविरबाट पहिचान भएका मोतियाबिन्दुका बिरामीमध्ये ३१३ जनाको निजगढस्थित तिलगंगा आँखा अस्पतालमा सफल शल्यक्रिया गरिएको जनाइएको छ ।
बाँकी मोतियाबिन्दुका बिरामीमध्ये केहीमा दीर्घरोगसम्बन्धी समस्या देखिएकाले तत्काल शल्यक्रिया गर्न नसकिएको नगरपालिकाले जनाएको छ । उनीहरूको आवश्यक उपचारपछि छठ पर्वपछि शल्यक्रिया गराउने व्यवस्था मिलाइने नगरपालिकाको भनाइ छ।
पर्सागढी नगरपालिकाको सभा हलमा आयोजित कार्यक्रमको समीक्षा गर्दै स्वास्थ्य शाखा प्रमुख नारायणप्रसाद पौडेलले मोतियाबिन्दुका कारण पर्सागढीका कुनै पनि नागरिक अन्धोपनको अवस्थामा पुग्न नपरोस् भन्ने उद्देश्यले शिविर सञ्चालन गरिएको बताए ।
उनका अनुसार शल्यक्रियाका लागि अस्पताल जाने बिरामीलाई नगरपालिकाले खानपान, बसोबास तथा आवतजावतका लागि यातायातको समेत व्यवस्था गरेको थियो । आर्थिक रूपमा कमजोर तथा ग्रामीण क्षेत्रका नागरिकलाई लक्षित गरी स्थानीयस्तरमै आँखा परीक्षण गर्ने र आवश्यक उपचारका लागि अस्पतालसम्म पुर्याउने व्यवस्था गरिएको पौडेलले बताए ।
नगर प्रमुख गोकर्ण पाठकले ग्रामीण तथा विपन्न परिवारका नागरिकलाई सहज रूपमा आँखा उपचार सेवा उपलब्ध गराउन नगरपालिका र तिलगंगा आँखा अस्पतालबीचको सहकार्यलाई आगामी दिनमा पनि निरन्तरता दिइने बताए ।
समीक्षा कार्यक्रममा शिविरबाट प्राप्त उपलब्धि, सेवा प्रवाहका क्रममा देखिएका समस्या तथा आगामी दिनमा आँखा स्वास्थ्य सेवालाई थप प्रभावकारी बनाउने विषयमा छलफल गरिएको थियो । कार्यक्रममा स्थानीयवासीले उपचार तथा सेवा प्रवाहसम्बन्धी सुझाव र गुनासासमेत राखेका थिए ।
निःशुल्क आँखा परीक्षण तथा शल्यक्रिया कार्यक्रम सफल बनाउन सहयोग गरेको भन्दै पर्सागढी नगरपालिकाले निजगढ तिलगंगा सामुदायिक आँखा अस्पताललाई प्रशंसापत्र समेत प्रदान गरेको छ ।
कार्यक्रममा नगर उपप्रमुख पूजा चौधरी, तिलगंगा आँखा अस्पताल निजगढका चिकित्सक डा. विष्णुहरि मरहठा, अस्पताल व्यवस्थापनका चन्द्र थापा लगायत कर्मचारीहरूको उपस्थिति थियो ।
