सूचना चुहावटलगायतका आरोपमा निलम्बनमा परेका सशस्त्र प्रहरी अतिरिक्त महानिरीक्षक (एआईजी) वंशीराज दाहाललाई सेवाबाट बर्खास्त गर्न छानबिन समितिले सिफारिस गरेको छ। सिफारिसअनुसार उनलाई भविष्यमा सरकारी सेवाका लागि समेत अयोग्य हुने गरी बर्खास्त गर्न प्रस्ताव गरिएको स्रोतले जनाएको छ ।
गृह मन्त्रालय स्रोतका अनुसार सशस्त्र प्रहरीका अर्का एआईजी अञ्जनीकुमार पोखरेलको नेतृत्वमा भएको छानबिनपछि दाहाललाई बर्खास्त गर्न सिफारिस गरिएको हो। उक्त सिफारिसका आधारमा गृह मन्त्रालयमा आवश्यक कागजात तयार पार्ने काम भइरहेको जनाइएको छ।
दाहाललाई सेवाबाट बर्खास्त गर्ने अन्तिम निर्णय भने मन्त्रिपरिषद्ले गर्ने व्यवस्था छ ।
एआईजी दाहाल गत १९ गते निलम्बनमा परेका थिए। उनी पूर्वप्रधानन्यायाधीश चोलेन्द्रशमशेर जबराका ज्वाइँ नाता पर्ने व्यक्ति हुन्। असोज ११ गते जबरा बाँसबारीस्थित निवासबाट पक्राउ परेपछि दाहाल उनलाई हिरासतमा भेट्न पुगेका थिए ।
दाहालमाथि प्रधानमन्त्री तथा गृहमन्त्रीहरूको व्यक्तिगत समयतालिकासम्बन्धी सूचना निगरानी गर्ने र गोप्य सूचना चुहावट गर्ने आरोप लागेको छ। पूर्वप्रधानन्यायाधीश जबराको मोबाइल फोनको प्राविधिक परीक्षणका क्रममा दाहालसँग सम्बन्धित सूचनाहरू फेला परेको सशस्त्र प्रहरी स्रोतको दाबी छ ।
त्यसैगरी, विभिन्न मुद्दामा पक्राउ परी थुनामा रहेका व्यवसायी दीपक भट्टलाई छुटाउन जबराले चलखेल गरेको र त्यसमा दाहालको भूमिका रहेको आशंकासमेत स्रोतले व्यक्त गरेको छ ।
गत वर्ष जेनजी आन्दोलनपछि विघटन भएको प्रतिनिधिसभाको विघटन संविधानविपरीत भएको दाबीसहित सर्वोच्च अदालतमा दायर रिटसमेत हाल विचाराधीन रहेको छ। उक्त रिटलाई आधार बनाएर सरकार ढाल्नेसम्मका गतिविधिमा जबरा सक्रिय रहेको र दाहालले सहयोगी भूमिका निर्वाह गरेको सशस्त्र प्रहरी स्रोतको दाबी छ।
यद्यपि, दाहालमाथि लगाइएका आरोप र छानबिन समितिको सिफारिससम्बन्धी विवरण मन्त्रालयको औपचारिक निर्णयबाट पुष्टि हुन बाँकी छ। बर्खास्तको अन्तिम निर्णय मन्त्रिपरिषद्बाट हुनुपर्ने भएकाले उनलाई सेवाबाट हटाउने प्रक्रिया अझै निर्णयको चरणमा रहेको छ ।
