सरकारले उखु उत्पादक किसानलाई प्रोत्साहनस्वरूप एक अर्ब ५० करोड रुपैयाँ अनुदान उपलब्ध गराउने भएको छ। कृषि, वन तथा पर्यावरणमन्त्री गीता चौधरीले उखु किसानलाई अनुदान प्रदान गर्ने सम्बन्धी कार्यविधि बिहीबार स्वीकृत गरेकी हुन् ।
मन्त्री चौधरीको निजी सचिवालयका अनुसार स्वीकृत कार्यविधिअनुसार उखु किसानलाई अनुदान वितरणको प्रक्रिया अघि बढाइनेछ ।
मन्त्रालयका अनुसार अनुदान रकम बर्दिया, रौतहट, कैलाली र कञ्चनपुरका उखु उत्पादक किसानलाई वितरण गरिनेछ। यसबाट उखु खेतीमा संलग्न किसानलाई प्रोत्साहन मिल्ने सरकारको अपेक्षा छ ।
सरकारले यसअघि पनि उखु किसानलाई उत्पादनका आधारमा प्रतिक्विन्टल ७० रुपैयाँका दरले अनुदान उपलब्ध गराउँदै आएको छ ।
उखु उत्पादनलाई प्रोत्साहन गर्ने उद्देश्यले उपलब्ध गराउन लागिएको डेढ अर्ब रुपैयाँ अनुदानबाट सम्बन्धित जिल्लाका किसान लाभान्वित हुने अपेक्षा गरिएको छ ।
