नेपाली कांग्रेसका नेता मोहन बस्नेतले गगन थापाको महत्त्वाकाङ्क्षा र विदेशीको इसारामा पार्टी विभाजन भएको आरोप लगाएका छन्। पार्टी विभाजित हुँदा आगामी सङ्घीय, प्रदेश तथा स्थानीय तहको निर्वाचनमा कांग्रेसलाई असर पर्ने उनको दाबी छ ।
पूर्वसभापति शेरबहादुर देउवा पक्षको क्षेत्रीय अधिवेशन उद्घाटन गर्न सिन्धुपाल्चोकको मेलम्ची पुगेका बस्नेतले पार्टी एकजुट रहेको भए आगामी निर्वाचनमा कांग्रेसले राम्रो परिणाम ल्याउन सक्ने बताएका हुन् ।
उनले भने, “गगन थापाजीको महत्त्वाकाङ्क्षाले विदेशीहरूको इसारामा पार्टी दुईटा नबनाइदिएको भए, अब आउने निर्वाचनमा सङ्घीय, प्रदेश चुनाव एक्लै लड्दा पनि जित्ने अवस्था थियो। स्थानीय तहमा पनि हामी कब्जा गर्न सक्थ्यौँ, तर अहिले छिन्नभिन्न ।”
बस्नेतले गगन थापासहित विश्वप्रकाश शर्मा र गुरुराज घिमिरेलाई नेविसंघको पृष्ठभूमिबाट आएका ‘टिके नेता’ भन्दै आलोचना गरे। उनीहरूले प्रत्यक्ष निर्वाचन जितेको विषयमा प्रश्न उठाउँदै आफूहरू कांग्रेसको कमजोर जनाधार भएका क्षेत्रमा समेत चुनाव जितेर आएको उनको दाबी थियो।
उनले जिल्लामा आफूले अवसर दिएका नेताहरूले समेत साथ छाडेको गुनासो गरे। विशेष महाधिवेशनको नाममा नाटक गरेर पार्टी अपहरण गरिएको आरोपसमेत उनले लगाए ।
गगन थापाको नेतृत्वमा काठमाडौंमा जारी महाधिवेशनप्रति पनि बस्नेतले कटाक्ष गरे। निर्वाचन हुने भनिए पनि त्यसको सुनिश्चिततामाथि प्रश्न उठाउँदै उनले आफूअनुकूल परिस्थिति नभए प्रक्रिया स्थगित हुन सक्ने आशङ्का व्यक्त गरे ।
त्यस्तै, बस्नेतले संस्थापन पक्षको क्षेत्रीय अधिवेशनमा पाँच जना पनि उपस्थित नभएको ठाउँमा ६ सय मत खसालिएको दाबी गरे। यद्यपि, उनले प्रस्तुत गरेको उक्त दाबीको स्वतन्त्र पुष्टि भएको विवरण उपलब्ध छैन ।
कांग्रेसभित्रको नेतृत्व विवाद र महाधिवेशन प्रक्रियाबारे नेताहरूबीच आरोप–प्रत्यारोप भइरहेका बेला बस्नेतको अभिव्यक्ति आएको हो ।
