नेपाली कांग्रेसको १५औँ महाधिवेशनअन्तर्गत चौथो दिनको बन्द सत्र हावाहुरी र वर्षाका कारण प्रभावित भएको छ ।
बिहान साढे ११ बजेबाट बन्द सत्र सञ्चालन गर्ने तयारी गरिएको भए पनि अचानक ठूलो हावाहुरीसहित वर्षा भएपछि महाधिवेशन प्रतिनिधिहरू खुलामञ्चमा पुग्न नसक्दा कार्यक्रम प्रभावित भएको कांग्रेसका प्रवक्ता देवराज चालिसेले जानकारी दिए ।
कांग्रेसले महाधिवेशनको बन्द सत्र काठमाडौंको खुलामञ्चमा सञ्चालन गरिरहेको छ। भृकुटीमण्डपमा प्रतिनिधिहरूका लागि खाना तथा अन्य व्यवस्थापन गरिएको छ भने राष्ट्रिय सभा गृहमा निर्वाचन समितिले निर्वाचनसम्बन्धी काम अघि बढाइरहेको छ ।
आजको बन्द सत्रमा विभिन्न राजनीतिक, संगठनात्मक तथा आर्थिक प्रस्ताव र प्रतिवेदनमाथिको छलफल टुंग्याएर पारित गर्ने तयारी कांग्रेसको छ ।
बन्द सत्रमा सभापति गगनकुमार थापाले प्रस्तुत गरेको ‘राष्ट्रिय पुनर्जागरण र समुन्नति’ सम्बन्धी राजनीतिक प्रस्ताव, उपसभापति विश्वप्रकाश शर्माले प्रस्तुत गरेको ‘राजनीतिक संस्कृतिको क्षय र युगानुकूल रूपान्तरणको अभिभारा’ सम्बन्धी समसामयिक प्रस्ताव, महामन्त्री गुरुराज घिमिरेको संगठनसम्बन्धी प्रतिवेदन तथा कोषाध्यक्ष उमेश श्रेष्ठको आर्थिक प्रतिवेदनमाथि छलफल भइरहेको छ ।
यी प्रस्ताव तथा प्रतिवेदनमाथि सोमबारदेखि नै महाधिवेशन प्रतिनिधिहरूले धारणा राख्दै आएका छन्। छलफलका क्रममा पार्टीको राजनीतिक दिशा, संगठन सुदृढीकरण, राजनीतिक संस्कृतिमा सुधार र आर्थिक व्यवस्थापनलगायत विषयमा प्रतिनिधिहरूले सुझाव दिएका छन् ।
वर्षाका कारण निर्धारित समय प्रभावित भए पनि मौसममा सुधार आएपछि बन्द सत्र पुनः सञ्चालन गर्ने तयारी कांग्रेसले गरेको छ। बाँकी प्रतिनिधिहरूको धारणा समेटेर प्रस्ताव तथा प्रतिवेदन पारित गर्ने प्रक्रिया अघि बढाइने जनाइएको छ ।
बन्द सत्रको अन्त्यमा सभापति गगनकुमार थापाले महाधिवेशन प्रतिनिधिहरूलाई सम्बोधन गर्ने कार्यक्रमसमेत रहेको छ। बन्द सत्रबाट राजनीतिक, संगठनात्मक र आर्थिक प्रतिवेदन पारित भएपछि कांग्रेस नेतृत्व चयनको निर्वाचन प्रक्रियातर्फ अघि बढ्नेछ ।
कांग्रेसको १५औँ महाधिवेशनमा नयाँ नेतृत्व चयनका लागि सभापतिमा गगनकुमार थापा, श्यामकृष्ण खड्की र किशोरसिंह राठौरले उम्मेदवारी दिएका छन्। निर्वाचन समितिका अनुसार नेतृत्व चयनका लागि भोलि बिहान मतदान हुने कार्यतालिका छ ।
