काठमाडौंको बुढानीलकण्ठमा विदेशमा बस्ने नेपालीको घर भाडामा लिएर सुन प्रशोधन तथा सम्भावित तस्करीको सञ्जाल सञ्चालन भइरहेको खुलेको छ। आवासीय प्रयोजनका लागि मासिक ३ लाख ३० हजार रुपैयाँ भाडा तिरेर लिइएको घरमा सुन गलाउने उपकरण, रसायन र प्रशोधन सामग्री राखिएको अवस्थामा प्रहरीले २१ किलो ७५० ग्राम सुनसहित तीन जना चिनियाँ नागरिकलाई पक्राउ गरेको छ ।
काठमाडौं उपत्यका अपराध अनुसन्धान कार्यालयले बिहीबार बिहान करिब ५ बजे बुढानीलकण्ठ नगरपालिका–२, माथिल्लो भङ्गालस्थित घरमा छापा मारेर उनीहरूलाई पक्राउ गरेको हो। प्रहरीका अनुसार शङ्कास्पद गतिविधिबारे विशेष सूचना पाएपछि केही समयदेखि निगरानी भइरहेको थियो। नेपाली नम्बर प्लेटको गाडीमा घरबाट बाहिर निस्कन खोजिरहेका बेला उनीहरू प्रहरीको नियन्त्रणमा परेका हुन् ।
शुक्रबार आयोजित पत्रकार सम्मेलनमा प्रहरीले पक्राउ परेका तीन जना, बरामद सुन तथा सुन प्रशोधनमा प्रयोग हुने उपकरण र रसायन सार्वजनिक गरेको छ। पक्राउ पर्नेमा २७ वर्षीय हान फेइ, ३७ वर्षीय वाङ जियानझेन र ४७ वर्षीय झोउ लोङक्विन रहेका छन् ।
कार्यालयका प्रमुख प्रहरी वरिष्ठ उपरीक्षक सन्तोष खड्काका अनुसार प्रारम्भिक सूचनाका आधारमा निगरानी बढाइएको थियो। घरमा प्रवेश गर्दा अपेक्षा गरेभन्दा ठूलो परिमाणमा सुन र प्रशोधनका सामग्री फेला परेको उनले बताए।
घरभित्रै सुन गलाउने र बिस्कुट बनाउने व्यवस्था
प्रहरीले बरामद गरेको सुनमध्ये १० किलो ९९७ ग्राम सुन ११ वटा टुक्रामा रहेको थियो। त्यस्तै, प्लास्टिकमा राखिएको अर्धठोस अवस्थामा १० किलो ७५२ ग्राम सुन फेला परेको प्रहरीले जनाएको छ। दुवैको कुल तौल २१ किलो ७४९ ग्राम हुन्छ ।
घरभित्र सुन गलाउने, प्रशोधन गर्ने र पुनः ठोस आकार दिने उपकरण तथा रसायनसमेत भेटिएकाले उक्त घर सुन प्रशोधन केन्द्रका रूपमा प्रयोग भइरहेको हुन सक्ने प्रहरीको प्रारम्भिक आकलन छ ।
प्रहरीका अनुसार सुनलाई धुलो वा अर्धठोस अवस्थामा नेपाल भित्र्याएर घरभित्रै प्रशोधन गरी बिस्कुटको आकारमा तयार पार्ने गरिएको हुन सक्ने आशङ्का छ। सुन हङकङबाट हवाई मार्ग हुँदै नेपाल ल्याइएको हुन सक्ने प्रारम्भिक अनुमान गरिए पनि यसको पुष्टि भइसकेको छैन।
घरधनी विदेशमा, भाडाको घरमा अवैध कारोबारको आशङ्का
मासिक ३ लाख ३० हजार रुपैयाँ भाडा तिरेर लिइएको घरमा यति ठूलो परिमाणमा सुन र प्रशोधनका उपकरण फेला परेपछि घरको वास्तविक प्रयोगबारे प्रश्न उठेको छ। घरधनी विदेशमा बस्ने नेपाली रहेको बताइएको छ ।
तर, घरधनीलाई घरभित्र भइरहेको गतिविधिबारे जानकारी थियो वा थिएन भन्ने विषयमा प्रहरीले कुनै निष्कर्ष सार्वजनिक गरेको छैन। घरधनीको संलग्नता रहेको प्रमाणसमेत अहिलेसम्म सार्वजनिक भएको छैन ।
त्यस्तै, सुन ओसारपसारमा प्रयोग गरिएको नेपाली नम्बर प्लेटको गाडी कसको नाममा दर्ता छ, कसले प्रयोग गरिरहेको थियो र सवारीधनी वा चालकलाई कारोबारबारे जानकारी थियो कि थिएन भन्ने विषय पनि अनुसन्धानकै क्रममा छ ।
सुनको स्रोत र सञ्जाल खोज्दै प्रहरी
पक्राउ परेका तीनै जना चिनियाँ नागरिकसँग दोभासेको सहयोगमा बयान लिने प्रयास भइरहेको प्रहरीले जनाएको छ। उनीहरूबाट सुनको स्रोत, कारोबारमा संलग्न अन्य व्यक्ति तथा सम्भावित गन्तव्यबारे जानकारी जुटाउने प्रयास भइरहेको छ।
प्रहरीले सुन कहाँबाट नेपाल भित्रिएको हो, कसरी ओसारपसार गरिन्थ्यो, कहाँ लैजाने तयारी थियो र यसमा नेपाली नागरिकको संलग्नता थियो वा थिएन भन्ने विषयमा अनुसन्धान गरिरहेको छ। आवश्यकताअनुसार चिनियाँ पक्षसँग समन्वय गरेर थप जानकारी लिने तयारीसमेत गरिएको छ।
विदेशी नागरिक, भाडामा लिइएको निजी घर, स्थानीय सवारीसाधन र सुन प्रशोधनका उपकरण जोडिएको यस घटनाले सुनको स्रोतदेखि प्रशोधन र ओसारपसारसम्मको सम्भावित सञ्जाल पहिचान गर्नुपर्ने चुनौती प्रहरीसामु खडा गरेको छ ।
बरामद सुनको वास्तविक स्रोत, कारोबारको विस्तृत स्वरूप र यसमा संलग्न अन्य व्यक्तिबारे भने अनुसन्धानबाट थप तथ्य खुल्न बाँकी छ।
