पोखरा महानगरपालिका–२८, माझठानाबाट विद्यार्थी बोकेर कालिका बोर्डिङ स्कुलतर्फ आउँदै गरेको बस दुर्घटनाको सत्यतथ्य छानबिन गर्न पोखरा महानगरपालिकाले समिति गठन गरेको छ ।
महानगर प्रमुख धनराज आचार्यले दुर्घटनाको कारण पहिचान गरी आगामी दिनमा यस्ता घटना दोहोरिन नदिन आवश्यक सुझावसहित प्रतिवेदन पेस गर्ने जिम्मेवारी दिएर समिति गठन गरिएको जानकारी दिएका छन् ।
शुक्रबार बिहान पोखरा–२८ को ओख्लेमा भएको दुर्घटनामा पाँच जनाको मृत्यु भएको थियो। महानगर प्रमुख आचार्यका अनुसार दुर्घटनाका बेला बसमा विद्यार्थी, चालक तथा स्थानीयसहित २२ जना सवार थिए। दुर्घटनामा घाइते भएकाहरूको उपचार भइरहेको छ ।
महानगरले गठन गरेको समितिको संयोजकमा वरिष्ठ शिक्षा अधिकृत बद्रीनाथ सुवेदी रहेका छन्। समितिका सदस्यमा मेकानिकल इन्जिनियर सरोज चालिसे, महानगर शिक्षा समिति सदस्य डोलराज पाण्डे, नगर प्रहरी निरीक्षक पुरुषोत्तम थापा र ट्राफिक सहायक निरीक्षक अमृत भट्टराई रहेका छन् ।
समितिलाई दुर्घटनाको कारण तथा घटनासँग सम्बन्धित विषयमा विस्तृत अध्ययन र छानबिन गरी पाँच दिनभित्र प्रतिवेदन बुझाउन समयसीमा तोकिएको छ। दुर्घटनाको वास्तविक अवस्था पहिचान गर्नुका साथै विद्यालयका सवारीसाधनको सुरक्षा अवस्था, विद्यार्थीको सुरक्षित आवागमन र यस्ता दुर्घटना रोक्न अपनाउनुपर्ने उपायबारे सुझाव दिन पनि समितिलाई जिम्मेवारी दिइएको छ ।
महानगर प्रमुख आचार्यले दुर्घटनाप्रति दुःख व्यक्त गर्दै मृतकप्रति श्रद्धाञ्जली अर्पण गरेका छन्। उनले शोकसन्तप्त परिवारजनप्रति समवेदना व्यक्त गर्दै घाइते विद्यार्थी, चालक तथा सहचालकको शीघ्र स्वास्थ्यलाभको कामना गरेका छन्।
विद्यार्थीको सुरक्षित आवागमन सुनिश्चित गर्न विद्यालयका सवारीसाधनको नियमित जाँच, सुरक्षा मापदण्डको पालना र प्रभावकारी अनुगमन आवश्यक रहेको उल्लेख गर्दै प्रमुख आचार्यले सम्बन्धित सबै पक्षको ध्यानाकर्षण गराएका छन् ।
दुर्घटनाको कारण पत्ता लगाउन गठन गरिएको समितिको प्रतिवेदनपछि घटनासँग सम्बन्धित थप तथ्य सार्वजनिक हुने अपेक्षा गरिएको छ ।
