काठमाडौंबाट धनगढीतर्फ जाँदै गरेको यात्रुवाहक बस नवलपरासी पश्चिमको बर्दघाट नगरपालिका–४ मा दुर्घटना हुँदा चालक र सहचालकसहित सात जना घाइते भएका छन् ।
सोमबार बिहान करिब ७ः३० बजे सुदूरपश्चिम यातायातको सु.प्र.०१–००१ ख २३३० नम्बरको बस अनियन्त्रित भएर सडकमा पल्टिएको प्रहरीले जनाएको छ ।
बसमा करिब ४० देखि ४५ जना यात्रु सवार रहेको बताइएको छ। दुर्घटनामा घाइते भएका सात जनालाई उपचारका लागि बर्दघाट नगर अस्पताल, चिसापानी पठाइएको छ। घाइतेहरूको अवस्था सामान्यदेखि मध्यम रहेको बर्दघाट प्रहरीले जनाएको छ ।
बस पल्टिने क्रममा सोही दिशाबाट आइरहेको भारतीय नम्बर प्लेटको एचआर ३९ जी २८७६ नम्बरको ट्रकमा समेत सामान्य ठक्कर लागेको थियो। ठक्करका कारण ट्रकको पछाडिको भागमा क्षति पुगेको प्रहरीले जनाएको छ ।
दुर्घटनाको जानकारी प्राप्त हुनासाथ इलाका प्रहरी कार्यालय बर्दघाटबाट प्रहरी निरीक्षकको कमान्डमा ट्राफिक प्रहरीसहित ११ जनाको टोली घटनास्थलमा खटिएको थियो ।
दुर्घटनापछि केही समय अवरुद्ध भएको पूर्व–पश्चिम राजमार्गमा अहिले यातायात पूर्णरूपमा सञ्चालनमा आइसकेको प्रहरीले जनाएको छ ।
