उदयपुरको बेलका नगरपालिका–५, सुपाडे देउरालीबाट प्रहरीले १५९ किलो ४०० ग्राम गाँजासहित एक जना पिकअप चालकलाई पक्राउ गरेको ।
प्रहरी चौकी लालबजार, उदयपुरबाट प्रहरी सहायक निरीक्षक गोविन्द सापकोटाको कमाण्डमा खटिएको टोलीले गाँजा बरामद गरेको हो ।
प्रहरीका अनुसार फत्तेपुरतर्फ जाँदै गरेको प्रदेश १–०२–००२ च ५२९० नम्बरको पिकअप जाँच गर्ने क्रममा धानको भुसका बोराले छोपेर लैजाँदै गरेको अवस्थामा गाँजा फेला परेको थियो। बरामद गाँजा तौल गर्दा १५९ किलो ४०० ग्राम रहेको पुष्टि भएको प्रहरीले जनाएको छ ।
गाँजासहित पक्राउ पर्नेमा सप्तरीको सप्तकोशी नगरपालिका–८, आदोरा निवासी अन्दाजी २८ वर्षीय पिकअप चालक पशुपति साफी रहेका छन् ।
प्रहरीले गाँजा र पिकअप नियन्त्रणमा लिएर घटनाबारे थप अनुसन्धान गरिरहेको जनाएको छ ।
