नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले देश गम्भीर अवस्थामा रहेको दाबी गर्दै देशको रक्षा र पार्टीको शक्ति सुदृढीकरणका लागि आन्दोलनको तयारीमा रहन नेता तथा कार्यकर्तालाई निर्देशन दिएका छन् ।
बुधबार पार्टी केन्द्रीय कार्यालय च्यासलमा मनोनीत केन्द्रीय सदस्यहरूको शपथग्रहण कार्यक्रमलाई सम्बोधन गर्दै अध्यक्ष ओलीले आन्दोलनबाट भागेर देशलाई वर्तमान अवस्थाबाट पार लगाउन नसकिने बताएका हुन् ।
उनले तत्कालै वा तिहार तथा छठपछि आवश्यकताअनुसार आन्दोलनमा उत्रिनुपर्ने अवस्था आउन सक्ने भन्दै पार्टीका नेता तथा कार्यकर्तालाई मानसिक रूपमा तयार रहन आग्रह गरे ।
‘देश गम्भीर अवस्थामा छ । यस अवस्थाबाट हामीले देशलाई पार लगाउनुपर्नेछ। यसका लागि हामी आन्दोलनका लागि तयार हुनुपर्छ,’ ओलीले भने। आन्दोलनले शक्ति आर्जन गर्ने, पार्टीलाई टिकाउने र अघि बढाउने उनको भनाइ थियो ।
अध्यक्ष ओलीले दक्षिणपन्थी शक्तिहरूले लोकतन्त्र र शान्तिको कुरा गरे पनि व्यवहारमा नेपाली जनतालाई धोका दिइरहेको आरोप लगाए । उनले सरकार बलजफ्ती अघि बढिरहेको दाबी गर्दै प्रहरीको कार्यशैलीप्रति समेत असन्तुष्टि व्यक्त गरे ।
प्रहरीले बिनाबर्दीमा पक्राउ गर्न जाने, बलजफ्ती घरभित्र प्रवेश गर्ने तथा ढोका फोरेर भित्र पस्ने गरेको आरोप लगाउँदै ओलीले यस्तो कार्यप्रति प्रश्न उठाए। उनले नागरिकले आफ्नो विचार व्यक्त गर्नसमेत डराउनुपर्ने अवस्था सिर्जना भएको दाबी गरे ।
ओलीले सरकार फाँसीवादतर्फ अघि बढिरहेको आरोप लगाउँदै राज्यका निकायहरूले स्वतन्त्रताको अभ्यास गर्न नसक्ने अवस्था आएको बताए । यस्तो परिस्थितिमा आन्दोलनकारी सोचका साथ अघि बढ्नुको विकल्प नरहेको उनको भनाइ थियो ।
उनले आगामी निर्वाचनलाई लक्षित गर्दै पार्टीका नेता तथा कार्यकर्तालाई संगठनात्मक तयारीमा जुट्न पनि निर्देशन दिए । निर्वाचनमा एमालेविहीन देश बनाउने योजनालाई असफल पार्ने गरी चुनावी अभियानमा लाग्नुपर्ने उनले बताए ।
आगामी स्थानीय तथा प्रदेश तहको निर्वाचनमा एमालेको पक्षमा परिणाम ल्याउन अहिलेबाटै तयारी गर्नुपर्ने उल्लेख गर्दै ओलीले पार्टीलाई कमजोर बनाउने प्रयासलाई निर्वाचनमार्फत जवाफ दिनुपर्ने धारणा राखे ।
ओलीको सम्बोधनमा सरकारको कार्यशैलीप्रति आलोचना, आन्दोलनको तयारी र आगामी निर्वाचनमा पार्टीको स्थिति सुदृढ बनाउने विषय प्रमुख रूपमा उठेका थिए ।
