राष्ट्रिय स्वतन्त्र पार्टी (रास्वपा) का सांसद खगेन्द्र सुनार बिहीबार बसेको संसदीय उपसमितिको बैठकमा अनुपस्थित भएका छन् । पार्टीले छानबिन प्रक्रिया पूरा नभएसम्म उनलाई सार्वजनिक तथा औपचारिक कार्यक्रममा सहभागी हुन रोक लगाएको छ ।
एक महिलालाई लक्षित गरी आपत्तिजनक भाषा प्रयोग गरेको र धम्की दिएको भनिएको अडियो सार्वजनिक भएपछि रास्वपाले सांसद सुनारमाथि छानबिन गरिरहेको छ । छानबिन प्रक्रिया नसकिएसम्म सार्वजनिक पदसँग सम्बन्धित गतिविधि तथा औपचारिक कार्यक्रममा सहभागी हुन रोक लगाइएकाले उनी उपसमितिको बैठकमा अनुपस्थित भएका हुन ।
बिहीबार बिहान सिंहदरबारमा निर्वाचन प्रहरी, नेपाल प्रहरी र सशस्त्र प्रहरी बल नेपालको पोशाक खरिदसम्बन्धी अध्ययन उपसमितिको दोस्रो बैठक बसेको थियो । बैठकमा उपसमितिको कार्यविधिबारे छलफल भएको छ ।
गत असोज १६ गते प्रतिनिधिसभाअन्तर्गतको सार्वजनिक लेखा समितिले निर्वाचन प्रहरीको पोशाक खरिदसम्बन्धी विषयमा अध्ययन गर्न उपसमिति गठन गरेको थियो । रास्वपा सांसद मनिष झाको नेतृत्वमा गठित नौ सदस्यीय उपसमितिको पहिलो बैठक असोज २१ गते बसेको थियो। पहिलो बैठकमा विषयवस्तुबारे प्रारम्भिक छलफल भएको थियो ।
उपसमितिमा सांसदहरू ऐन महर, योगेश गौचन थकाली, आरेन राई, खगेन्द्र सुनार, खुश्बु ओली, रमेशकुमार मल्ल, गणेश धिमाल र महेन्द्रबहादुर शाही सदस्य छन्।
उपसमितिलाई अध्ययन तथा प्रतिवेदन तयार गर्न दुई महिनाको समय दिइएको छ । निर्धारित अवधिभित्र प्राप्त उजुरी र नेपाल प्रहरी तथा सशस्त्र प्रहरी बल नेपालबाट प्राप्त विवरण अध्ययन गरी प्रतिवेदन बुझाउने गरी कार्यविधि तयार गरिएको छ। उपसमितिको सचिवालयले विवरण संकलन र प्रारम्भिक अध्ययनको काम कात्तिक ३० गतेसम्म सक्ने लक्ष्य राखेको छ ।
निर्वाचन प्रहरीको पोशाक खरिदबारे अध्ययन
नेपाल प्रहरीले गत वर्ष माघमा निर्वाचन प्रहरीका लागि पोशाक खरिद गरेको थियो । उक्त खरिद प्रक्रियामा अनियमितता भएको दाबी गर्दै सांसद सुनारले निरन्तर प्रश्न उठाउँदै आएका थिए । छोटो अवधिका लागि नियुक्त निर्वाचन प्रहरीलाई उपलब्ध गराइएको पोशाकको गुणस्तरबारे प्रश्न उठेपछि त्यस विषयमा अध्ययन गर्न संसदीय उपसमिति गठन गरिएको हो ।
फागुन २१ गतेको प्रतिनिधिसभा निर्वाचनका लागि नेपाल प्रहरीले एक लाख ३३ हजार ९८० जना र सशस्त्र प्रहरी बल नेपालले १५ हजार ११० जना निर्वाचन प्रहरी भर्ना गरेका थिए। दुवै सुरक्षा निकायमा गरी कुल एक लाख ४९ हजार ९० जना निर्वाचन प्रहरी भर्ना भएका थिए ।
निर्वाचन प्रहरीका लागि भूगोलअनुसार प्रतिव्यक्ति न्यूनतम ५० हजार ९५४ रुपैयाँदेखि अधिकतम ८६ हजार ४८४ रुपैयाँसम्म खर्च भएको विवरण छ । उनीहरूले ४० दिनको अवधिका लागि पारिश्रमिक, रासन, यातायात र खाजा खर्च पाएका थिए ।
सरकारले निर्वाचन प्रहरीको पोशाकका लागि हिमाली क्षेत्रमा खटिने प्रहरीलाई प्रतिव्यक्ति ११ हजार ५०० रुपैयाँ, पहाडी क्षेत्रमा खटिनेलाई ७ हजार ९४५ रुपैयाँ र तराई क्षेत्रमा खटिनेलाई ६ हजार १७० रुपैयाँका दरले रकम छुट्याएको थियो । पोशाक शीर्षकमा करिब एक अर्ब रुपैयाँ निकासा भएको विवरण छ ।
त्यस्तै, प्रहरी प्रधान कार्यालयले खटिएको स्थानमा जान र फर्कन तयारी खर्चबापत ८४८ रुपैयाँ तथा चार दिनको तालिम अवधिको खाजाबापत एकमुष्ट १ हजार २०० रुपैयाँ उपलब्ध गराएको थियो ।
निर्वाचन प्रहरीलाई उपलब्ध गराइएको पोशाकको गुणस्तर, खरिद प्रक्रिया र खर्चसम्बन्धी विषयमा उठेका प्रश्नको अध्ययन गरी उपसमितिले प्रतिवेदन तयार गर्नेछ ।
