सरकारले नेपाल प्रहरीका महानिरीक्षक (आईजीपी) दानबहादुर कार्कीलाई पदबाट हटाउन खोजेको चर्चा सार्वजनिक भएपछि प्रहरी प्रधान कार्यालयमा हलचल मच्चिएको छ । यसैबीच आईजीपी कार्कीले बिहीबार प्रहरीका उच्च अधिकृतहरूको आकस्मिक बैठक बोलाएका छन् ।
प्रहरी प्रधान कार्यालय नक्सालमा बिहीबार दिउँसो २ बजेदेखि साँझ ७ बजेसम्म चलेको बैठकमा काठमाडौंमा कार्यरत प्रहरी वरिष्ठ उपरीक्षक (एसएसपी) सहित प्रहरी नायब महानिरीक्षक (डीआईजी) र सोभन्दा माथिल्लो तहका अधिकारीहरू सहभागी भएका थिए । प्रदेशमा कार्यरत डीआईजीहरूलाई समेत तत्काल काठमाडौं उपस्थित हुन निर्देशन दिइएको थियो ।
आईजीपी कार्कीलाई हटाउने तयारी सरकारले गरेको भन्ने विवरण सार्वजनिक भएपछि प्रहरी संगठनभित्र उत्पन्न परिस्थितिबारे छलफल गर्न उनले उच्च अधिकृतहरू सम्मिलित पुलिस पोलिसी कोअर्डिनेसन कमिटी (पीसीसी) को बैठक बोलाएका थिए ।
बैठकपछि प्रहरी प्रधान कार्यालयले विज्ञप्ति जारी गर्दै प्रहरी संगठनलाई विवादमा तान्ने प्रयास गर्नेहरूमाथि कानुनी कारबाही गर्ने चेतावनी दिएको छ ।
विज्ञप्तिमा भनिएको छ, ‘सुरक्षा संगठनलाई विवादमा तानेर सरकारविरुद्ध खेल्न सकिन्छ भन्ने सोच बनाएका केही सीमित व्यक्तिको चालबाजीलाई प्रहरीले प्रचलित कानुनबमोजिम आवश्यक अनुसन्धान तथा कानुनी कारबाही प्रक्रिया अगाडि बढाउने व्यहोरासमेत सम्बन्धित सबैमा जानकारी गराइन्छ ।’
बैठकमा सहभागी एक उच्च प्रहरी अधिकारीका अनुसार आईजीपी कार्कीले पछिल्लो समय प्रहरी संगठनविरुद्ध विभिन्न प्रहार भइरहेको भन्दै सबै अधिकारीलाई एकजुट भएर अघि बढ्न आग्रह गरेका थिए ।
प्रहरीको व्यावसायिकता, छवि र प्रतिष्ठामा आँच पुर्याउने गतिविधि भइरहेको उल्लेख गर्दै उनले संगठनको आन्तरिक एकता कायम राख्न निर्देशन दिएका थिए ।
ती अधिकारीका अनुसार आईजीपी कार्कीले संगठनबाहिरका केही व्यक्तिको नामसमेत लिएर सचेत गराउँदै संगठनका आन्तरिक विषय बाहिर सार्वजनिक नगर्न उच्च अधिकृतहरूलाई आग्रह गरेका थिए ।
सरकारले आईजीपी कार्कीलाई हटाउन खोजेको चर्चाका बीच बोलाइएको यो आकस्मिक बैठक र बैठकपछि जारी गरिएको विज्ञप्तिलाई प्रहरी संगठनभित्र विकसित पछिल्लो परिस्थितिसँग जोडेर हेरिएको छ ।
