जनकपुरधाम । मधेस प्रदेशमा नयाँ सरकार गठनका लागि नेकपा (एमाले), जनता समाजवादी पार्टी (जसपा) नेपाल र जनमत पार्टीबीच छलफल अघि बढेको छ ।
नेपाली कांग्रेस संसदीय दलका नेता कृष्णप्रसाद यादव नेतृत्वको सरकारलाई एमालेले गत असोज २५ गते दिएको समर्थन फिर्ता लिएपछि तीन दल नयाँ सरकार गठनको तयारीमा जुटेका हुन् ।
जनमत पार्टीका नेता तथा प्रदेशसभा सदस्य महेशप्रसाद यादवका अनुसार तीन दलबीच नयाँ सरकार गठनका विषयमा छलफल भइरहेको छ । यद्यपि, सरकारको नेतृत्व कसले गर्ने भन्ने विषयमा भने ठोस सहमति भइसकेको छैन ।
एमाले संसदीय दलका नेता सरोजकुमार यादवले पनि जसपा र जनमत पार्टीका नेताहरूसँग नयाँ सरकार गठनका विषयमा संवाद भइरहेको बताउनुभएको छ । चाडपर्व सकिएपछि छलफललाई निष्कर्षमा पुर्याइने उहाँको भनाइ छ ।
नयाँ राजनीतिक समीकरण बनेसँगै सरकारको नेतृत्वका लागि तीनवटै दलले आ–आफ्नो दाबी प्रस्तुत गर्दै आएका छन् । प्रदेशसभामा सबैभन्दा ठूलो दल रहेको जसपा नेपालले सरकारको नेतृत्व आफूले पाउनुपर्ने दाबी गरेको छ ।
जसपा संसदीय दलका नेता सरोजकुमार यादवका अनुसार तीनवटै दलका अध्यक्षबीच प्रदेश सरकारको नेतृत्वका विषयमा केन्द्रबाटै सहमति जुटाउने समझदारी भएको छ ।
१०७ सदस्यीय मधेस प्रदेशसभामा सरकार गठनका लागि कम्तीमा ५४ प्रदेशसभा सदस्यको समर्थन आवश्यक पर्छ। हाल प्रदेशसभामा नेपाली कांग्रेसका २२, एमालेका २३, जसपा नेपालका २७, नेपाली कम्युनिष्ट पार्टीका १५ र जनमत पार्टीका १२ सदस्य छन्। त्यस्तै, सङ्घीय समाजवादी पार्टी र राष्ट्रिय प्रजातन्त्र पार्टीका एक–एक सदस्य रहेका छन् ।
तीन दलबीच सहमति जुटेमा नयाँ सत्ता समीकरण बन्ने सम्भावना रहे पनि सरकारको नेतृत्व र मन्त्रालय बाँडफाँटलगायत विषयमा भने अझै टुङ्गो लाग्न बाँकी छ ।
