जनकपुरधाम । दसैँको टीकाका दिन घरबाट बेपत्ता भएका धनुषाको नगराइन नगरपालिका–७ देवडिहाका सात वर्षीय साकेत झा १० दिनपछि मृत अवस्थामा फेला परेका छन् ।
घरपरिवार, स्थानीयवासी र प्रहरीले निरन्तर खोजी गर्दा पनि उनलाई जीवित भेट्ने आशा अन्ततः निराशामा परिणत भएको छ । घरबाट करिब पाँच किलोमिटर उत्तरतर्फ रहेको धानखेतमा शनिबार उनको शव फेला परेको हो ।
धनुषाका प्रहरी प्रवक्ता प्रहरी नायब उपरीक्षक (डीएसपी) ओमप्रकाश खनालका अनुसार धानखेतमा बालकको शव फेला परेपछि प्रहरी टोली घटनास्थल पुगेर अनुसन्धान सुरु गरेको छ । प्रारम्भिक अवस्थामा शव सडेको अवस्थामा रहेको उनले बताए ।
‘प्रारम्भिक अवस्थामा हेर्दा बालकको शव डिस्कम्पोजको अवस्थामा रहेको छ । थप अनुसन्धान अगाडि बढाएका छौँ,’ डीएसपी खनालले भने ।
गत कात्तिक ४ गते दसैँको टीकाका दिन घरबाट निस्किएपछि साकेत बेपत्ता भएका थिए । उनी सम्पर्कविहीन भएपछि परिवारजनले खोजीका लागि हारगुहार गरेका थिए । बालकको खोजीमा सहयोग गर्न परिवारले सामाजिक सञ्जालमार्फत समेत सर्वसाधारणसँग अपिल गरेको थियो ।
साकेतको खोजी देवडिहा गाउँमा मात्र सीमित रहेन । नेपालका विभिन्न स्थानका साथै भारतको बिहारसँग जोडिएका सहरहरूमा समेत उनको खोजी गरिएको थियो । प्रहरी र स्थानीयवासीले आसपासका गाउँ, पोखरी, झाडी तथा अन्य सम्भावित स्थानमा खोजीलाई तीव्रता दिएका थिए ।
तर, १० दिनसम्मको निरन्तर खोजीपछि साकेत जीवित नभई मृत अवस्थामा फेला परेका छन् । बालकको मृत्युको कारण र घटनाको वास्तविकता पत्ता लगाउन प्रहरीले थप अनुसन्धान गरिरहेको जनाएको छ ।
