बाराको फेटा गाउँपालिका–३ मा नवनिर्मित १५ शय्याको अस्पताल उद्घाटन गर्ने विषयमा भएको झडपका क्रममा प्रहरीको गोली लागेर घाइते भएका स्थानीय युवक आदित्य पासवानलाई थप उपचारका लागि काठमाडौं लगिएको छ ।
गम्भीर घाइते पासवानलाई आइतबार नेपाली सेनाको हेलिकप्टरमार्फत काठमाडौंस्थित त्रिवि शिक्षण अस्पताल पुर्याइएको हो ।
अस्पताल उद्घाटनको विषयलाई लिएर शनिबार स्थानीय र प्रहरीबीच झडप भएको थियो । अस्पतालमा आवश्यक स्रोतसाधन तथा जनशक्तिको व्यवस्था नगरी उद्घाटन गर्न लागिएको भन्दै स्थानीयले विरोध प्रदर्शन गरेका थिए । प्रदर्शनका क्रममा शिलालेख र टेन्टमा तोडफोड हुनुका साथै मोटरसाइकलमा आगजनीको प्रयास भएपछि स्थिति तनावपूर्ण बनेको थियो ।
स्थिति नियन्त्रणमा लिन प्रहरीले गोली चलाएको थियो। प्रहरीले हवाई फायर गरेको दाबी गरे पनि सोही क्रममा पासवानको शरीरको पछाडिको भाग (हिप) मा गोली लागेको थियो। घटनामा केही स्थानीय र पाँच जना प्रहरीसमेत घाइते भएका थिए ।
गोली लागेर गम्भीर घाइते भएका पासवानलाई तत्काल उपचारका लागि वीरगंजस्थित नेसनल मेडिकल कलेजमा भर्ना गरिएको थियो । अस्पताल पुर्याएलगत्तै चिकित्सकले उनको शल्यक्रिया गरेका थिए ।
जिल्ला प्रहरी कार्यालय पर्साका प्रमुख प्रहरी उपरीक्षक (एसपी) पवन भट्टराईका अनुसार पहिलो चरणको शल्यक्रियापछि पनि थप उपचार आवश्यक देखिएकाले चिकित्सकको सल्लाहमा पासवानलाई काठमाडौं पठाइएको हो ।
‘घाइते पासवानको पहिलो चरणको शल्यक्रिया भइसकेको थियो,’ एसपी भट्टराईले भने, ‘थप उपचारको आवश्यकता परेकाले चिकित्सकको सल्लाहमै काठमाडौं पठाएका छौँ ।’
अस्पताल उद्घाटनलाई लिएर सुरु भएको विवादले उग्र रूप लिएपछि भएको झडप र प्रहरीको गोली लागेर स्थानीय युवक घाइते भएको घटनाबारे अहिले विभिन्न प्रश्न उठिरहेका छन् ।
