सर्वोच्च अदालतका न्यायाधीश हरि फुयाल तिहार बिदापछि मात्रै अदालत फर्किने गरी बिदामा बसेका छन् ।
सर्वोच्च अदालत प्रशासनका अनुसार न्यायाधीश फुयालले मंगलबारदेखि शुक्रबारसम्मका लागि बिदा लिएका हुन् । शुक्रबारपछि तिहार बिदा सुरु हुने भएकाले उनी आगामी ३० कात्तिकमा मात्रै अदालतमा हाजिर हुनेछन् ।
उच्चपदस्थ अधिकारीहरूसँग सेटिङको प्रयास गरेको आरोपमा पक्राउ परेका इनम सापकोटासँग होटल हिमालयमा भेट गरेको विवरण सार्वजनिक भएपछि न्यायाधीश फुयाल विवादमा तानिएका थिए । उक्त विवरण सार्वजनिक भएसँगै उनको भेटघाट र त्यसको न्यायिक निष्पक्षतामाथि प्रश्न उठेको थियो ।
विवाद चर्किएपछि न्यायाधीश फुयालले सापकोटासँग भेट भएको स्वीकार गर्दै उक्त भेटका कारण आफूले सुनुवाइ गरिरहेका विचाराधीन मुद्दाहरू प्रभावित नभएको स्पष्टीकरण दिएका थिए ।
यसैबीच, उनी तिहार बिदापछि मात्रै अदालत फर्किने गरी बिदामा बसेका हुन् ।
