मधेश प्रदेशका स्वास्थ्य तथा जनसङ्ख्यामन्त्री नागेन्द्र साहले स्वास्थ्य क्षेत्रमा देखिएका बेथिति सुधार गर्न प्रदेश सरकार दृढताका साथ अघि बढेको बताउनुभएको छ ।
स्वास्थ्य निर्देशनालय मधेश प्रदेशको आयोजनामा मंगलबारदेखि जनकपुरधाममा सुरु भएको आर्थिक वर्ष २०८२।०८३ मा सम्पादित स्वास्थ्य कार्यक्रमहरूको चारदिने प्रदेशस्तरीय वार्षिक समीक्षा गोष्ठीको उद्घाटन गर्दै उहाँले यस्तो बताउनुभएको हो ।
विगतको तुलनामा मधेश प्रदेशको स्वास्थ्य क्षेत्रमा धेरै सुधार भए पनि अझै सुधारको आवश्यकता रहेको उहाँले बताउनुभयो । स्वस्थ मधेश प्रदेश निर्माणका लागि इमानदारीपूर्वक आ–आफ्नो जिम्मेवारी पूरा गर्न उहाँले स्वास्थ्यकर्मीहरूलाई निर्देशन दिनुभयो ।
मधेश प्रदेशको स्वास्थ्य क्षेत्रमा पदअनुसार दरबन्दी मिलान गर्न मन्त्रालयले काम अघि बढाएको उहाँले जानकारी दिनुभयो । मन्त्री साहले चार दिनसम्म सञ्चालन हुने वार्षिक समीक्षा गोष्ठीमा गम्भीर छलफल र समीक्षा गर्न स्वास्थ्यकर्मीहरूलाई आग्रह गर्नुभयो । छलफलबाट आएका सुझावलाई मन्त्रालयले आत्मसात् गर्दै स्वास्थ्य क्षेत्रको सुधारका लागि काम गर्ने प्रतिबद्धतासमेत उहाँले व्यक्त गर्नुभयो ।
कार्यक्रममा स्वास्थ्य तथा जनसङ्ख्या मन्त्रालय, मधेश प्रदेशका सचिव डा। प्रमोद यादवले सङ्घीयता कार्यान्वयनमा आएपछि मधेश प्रदेशको स्वास्थ्य क्षेत्रमा उल्लेख्य सुधार भएको दाबी गर्नुभयो । सुधार गर्न बाँकी रहेका विषयमा सबैले इमानदारीपूर्वक भूमिका निर्वाह गरे स्वास्थ्य क्षेत्रका अधिकांश समस्या समाधान हुने उहाँको भनाइ थियो । यसका लागि सबैको इमानदार प्रयास आवश्यक रहेको उहाँले बताउनुभयो ।
स्वास्थ्य निर्देशनालय मधेश प्रदेशका निर्देशक नवलकिशोर झाको अध्यक्षतामा भएको उद्घाटन कार्यक्रममा मधेश प्रदेशका स्वास्थ्य क्षेत्रका कर्मचारीहरूको उपस्थिति थियो ।
चार दिनसम्म सञ्चालन हुने वार्षिक समीक्षा गोष्ठीमा मधेश प्रदेशका आठवटै जिल्लाका प्रादेशिक अस्पताल, स्वास्थ्य कार्यालय र आयुर्वेद कार्यालयले वार्षिक प्रगति विवरण प्रस्तुत गर्ने स्वास्थ्य निर्देशनालयका स्वास्थ्यकर्मी विनोद यादवले जानकारी दिनुभयो ।
स्वास्थ्य कार्यालय धनुषाका जनस्वास्थ्य अधिकृत उमेश यादवका अनुसार गोष्ठीको पहिलो दिन स्वास्थ्य निर्देशनालय मधेश प्रदेश र स्वास्थ्य कार्यालय सप्तरीले वर्षभरि स्वास्थ्य क्षेत्रमा सञ्चालन गरेका कार्यक्रमबारे प्रस्तुति दिएका छन् ।
