भारतबाट मोटरसाइकलमा लुकाएर नेपाल भित्र्याउँदै गरेको स्रोत नखुलेको ३० लाख रुपैयाँसहित एक भारतीय नागरिक पक्राउ परेका छन् । पक्राउ परेका व्यक्तिको बयानका आधारमा प्रहरीले गौरस्थित एक व्यापारिक प्रतिष्ठानमा खानतलासी गर्दा थप १४ लाख ६४ हजार ६०५ रुपैयाँ बरामद गरेको छ ।
प्रहरीले दुवै स्थानबाट गरी कुल ४४ लाख ६४ हजार ६०५ रुपैयाँ बरामद गरेको हो ।
जिल्ला प्रहरी कार्यालय रौतहटका अनुसार बुधबार ईशनाथ नगरपालिका–४ स्थित महुलियाको काली मन्दिर नजिक भारतबाट नेपालतर्फ आउँदै गरेको भारतीय नम्बर प्लेटको एमपी ०५–००१ प ०५७८ नम्बरको मोटरसाइकल रोकेर जाँच गरिएको थियो ।
मठिया–महुलियातर्फ आउने सडकखण्डमा गरिएको जाँचका क्रममा मोटरसाइकल चालकको साथबाट स्रोत नखुलेको ३० लाख रुपैयाँ फेला परेको प्रहरीले जनाएको छ ।
पक्राउ पर्नेमा भारतको बिहार राज्यस्थित पूर्वी चम्पारण जिल्लाको फुलबरिया ग्राम पञ्चायत–१३ निवासी ३० वर्षीय सनिकुमार जैसवाल रहेका छन् । उनले झोलामा र मोटरसाइकलको ट्यांकीमुनि फल्स बटम बनाएर रकम लुकाएको पाइएको प्रहरीले जनाएको छ । प्रहरीले रकमसँगै एउटा स्मार्ट मोबाइल फोनसमेत बरामद गरेको छ ।
मोटरसाइकल चालक जैसवाललाई नियन्त्रणमा लिएर जिल्ला प्रहरी कार्यालयमा प्रारम्भिक सोधपुछ गर्दा उक्त रकम गौर नगरपालिका–१ स्थित न्यु तराई ट्रेडर्सका सञ्चालक शेख कमरुललाई दिन ल्याएको खुलेको जिल्ला प्रहरी कार्यालय रौतहटका डीएसपी वसन्त गौतमले जानकारी दिए ।
जैसवालको बयानका आधारमा प्रहरी निरीक्षक जीवनकुमार मैनालीको कमान्डमा खटिएको प्रहरी टोलीले न्यु तराई ट्रेडर्समा खानतलासी गरेको थियो। त्यसक्रममा थप १४ लाख ६४ हजार ६०५ रुपैयाँ बरामद भएको डीएसपी गौतमले बताए ।
प्रहरीले रकमसहित ट्रेडर्सका सञ्चालक कमरुललाई समेत नियन्त्रणमा लिएर अनुसन्धान अघि बढाएको छ ।
बरामद रकमको स्रोत, भारतबाट नेपाल भित्र्याउनुको प्रयोजन, रकमको वास्तविक स्वामित्व तथा घटनामा अन्य व्यक्तिको संलग्नताबारे अनुसन्धान भइरहेको प्रहरीले जनाएको छ ।
