सिरहामा ट्रक र मोटरसाइकल एकआपसमा ठोक्किँदा दुई जनाको मृत्यु भएको छ । दुर्घटनामा मोटरसाइकलमा सवार दुवै जनाको मृत्यु भएको हो ।
प्रहरीका अनुसार सिरहा नगरपालिका–११ भलुवाहीस्थित चौहर्वा–सिरहा सडकखण्डमा ना.१ घ.५५३ नम्बरको ट्रक र स.९ प.७६५० नम्बरको मोटरसाइकल एकआपसमा ठोक्किएका थिए ।
आज बिहान चौहर्वाबाट सिरहातर्फ जाँदै गरेको विद्युत् प्राधिकरण मधेश प्रदेश प्रादेशिक कार्यालय जनकपुरको ट्रक र सिरहाबाट चौहर्वातर्फ आउँदै गरेको मोटरसाइकलबीच दुर्घटना भएको प्रहरीले जनाएको छ ।
दुर्घटनामा मोटरसाइकलमा सवार पहिचान नखुलेका दुई जना पुरुष गम्भीर घाइते भएका थिए । उनीहरूलाई उपचारका लागि प्रादेशिक अस्पताल सिरहा लगिएको थियो । तर उपचारका क्रममा चिकित्सकले दुवै जनालाई मृत घोषणा गरेका थिए ।
दुर्घटनापछि ट्रक चालक फरार रहेकाले उनको खोजी भइरहेको प्रहरीले जनाएको छ । दुवै सवारीसाधनलाई प्रहरी कार्यालयमा ल्याउने प्रक्रिया अघि बढाइएको छ ।
मृतक दुवै जनाको पहिचान खुल्न नसकेको र आफन्तको खोजी भइरहेको प्रहरीले जानकारी दिएको छ ।
