पर्साको जगरनाथपुर गाउँपालिकाले आफ्नै नवनिर्मित प्रशासनिक भवनबाट सेवा प्रवाह गर्ने भएको छ ।
गाउँपालिकाको वडा नम्बर–४ मा निर्माण सम्पन्न भएको १२ कोठे प्रशासनिक भवन बुधबार एक समारोहबीच पूर्वमन्त्री एवं नेपाली कांग्रेसका नेता रमेश रिजालले उद्घाटन गरेका हुन् ।
गाउँपालिकाको प्रशासनिक भवन निर्माणका लागि पूर्वमन्त्री रिजालले १२ कठ्ठा जग्गा दान गरेका थिए । पर्सा निर्वाचन क्षेत्र नम्बर–४ का पूर्वसांसदसमेत रहेका रिजालले उपलब्ध गराएको जग्गा २०८१ फागुन १ गतेको निर्णयअनुसार गाउँपालिकाको नाममा कायम भएपछि भवन निर्माण प्रक्रिया अघि बढाइएको थियो ।
कुल ३ करोड ३४ लाख रुपैयाँको लागतमा निर्माण सम्पन्न भएको भवनमा गाउँपालिकाको २ करोड ३५ लाख रुपैयाँ, जिल्ला समन्वय समितिको ३५ लाख रुपैयाँ र प्रदेशसभा सदस्य जनार्दन सिंह क्षेत्रीको संसदीय विकास कोषबाट ६४ लाख रुपैयाँ लगानी गरिएको छ ।
भवन उद्घाटन समारोहलाई सम्बोधन गर्दै गाउँपालिका अध्यक्ष श्रीकान्तप्रसाद यादवले यसअघि मदरसाको भवनबाट सञ्चालन हुँदै आएको गाउँपालिकाको प्रशासनिक कामकाज अब आफ्नै भवनबाट सञ्चालन हुने जानकारी दिए । १२ कोठे आधुनिक प्रशासनिक भवन निर्माण भएपछि सेवाग्राहीलाई सेवा लिन सहज हुने र कार्यालयको कामकाजसमेत व्यवस्थित हुने उनले विश्वास व्यक्त गरे ।
अध्यक्ष यादवले आफ्नो कार्यकालमा गाउँपालिकाको आफ्नै प्रशासनिक भवन निर्माण गर्ने प्रतिबद्धता पूरा भएको उल्लेख गर्दै शिक्षा, स्वास्थ्य र कृषि क्षेत्रको विकासका लागि पनि विभिन्न महत्वपूर्ण काम अघि बढाइएको बताए ।
कार्यक्रममा सहभागी वक्ताहरूले गाउँपालिकाको आफ्नै प्रशासनिक भवन निर्माणलाई स्थानीय विकास र सार्वजनिक सेवा प्रवाहका दृष्टिले महत्वपूर्ण उपलब्धिका रूपमा व्याख्या गरेका थिए । उनीहरूले अध्यक्ष यादवको कार्यकालमा भएका विकास निर्माणका कामहरूको प्रशंसासमेत गरेका थिए ।
गाउँपालिका अध्यक्ष यादवको अध्यक्षतामा सम्पन्न उद्घाटन समारोहमा पूर्वमन्त्री एवं प्रदेशसभा सदस्य जनार्दन सिंह क्षेत्री, वीरगञ्ज महानगरपालिकाका उपप्रमुख इम्तियाज आलम, पटेर्वासुगौली गाउँपालिकाका अध्यक्ष दिनेश चौधरी, उपाध्यक्ष ममता महतो, जिराभवानी गाउँपालिकाकी उपाध्यक्ष रेखा चौधरी, जगरनाथपुर गाउँपालिकाकी उपाध्यक्ष बबिता सिंह क्षेत्रीलगायतको उपस्थिति थियो ।
त्यस्तै, गाउँपालिकाका प्रमुख प्रशासकीय अधिकृत सुनिल केशरी, पूर्वप्रदेशसभा सदस्य प्रह्लाद गिरी, नेपाली कांग्रेस पर्साका कार्यवाहक सभापति रामनारायण कुर्मीलगायत विभिन्न जनप्रतिनिधि, राजनीतिकर्मी तथा स्थानीयवासी सहभागी थिए ।
कार्यक्रमको सञ्चालन शिक्षक रुपनारायण साहले गरेका थिए ।
