मकवानपुरको भीमफेदीमा बिहीबार बिहान भएको गाडी दुर्घटनामा घाइते हुनेको संख्या ६ पुगेको छ । दुर्घटनापछि खोजतलास गर्ने क्रममा झाडीमा एक बालक घाइते अवस्थामा फेला परेका छन् ।
सशस्त्र प्रहरी बलका सहप्रवक्ता प्रहरी नायब उपरीक्षक (डीएसपी) शैलेन्द्र थापाका अनुसार दुर्घटनास्थलमा खोजी गर्ने क्रममा झाडीमा घाइते अवस्थामा बालक भेटिएका हुन् । उनलाई उद्धार गरी थप उपचारका लागि हेटौँडा लगिएको उनले जानकारी दिए ।
यसअघि दुर्घटनास्थलबाट पाँच जनालाई उद्धार गरी अस्पताल पठाइएको थियो । घाइते हुनेमा सर्लाहीको चक्रघट्टा गाउँपालिका–४ निवासी ३३ वर्षीय मुकेश यादव, पाँच वर्षीय सक्षमकुमार यादव र तीन वर्षीय सुजन यादव रहेका छन् । उनीहरूको अवस्था सामान्य रहेको छ ।
त्यस्तै, सोही स्थानका करिब २६ वर्षीय देवेन्द्र यादव गम्भीर घाइते भएका छन् भने देवेन्द्र राय मध्यम घाइते भएका छन् । पछिल्लो समय झाडीमा फेला परेका बालकको पहिचान भने खुलाइएको छैन ।
दुर्घटनामा गाडीमा सवार १६ जनामध्ये १० जनाको घटनास्थलमै मृत्यु भएको थियो । मृतकमध्ये दुई जनाको शव हेटौँडा अस्पताल ल्याइएको छ भने बाँकी आठ जनाको पहिचान खुल्न बाँकी रहेको डीएसपी थापाले जानकारी दिए ।
मृत्यु हुनेमा गाडी चालक सर्लाहीको कबिलासी नगरपालिका–८ निवासी करिब ३० वर्षीय रविशंकरकुमार मण्डल र चक्रघट्टा गाउँपालिका–४, सुन्दरपुरटोल निवासी सुवेक यादव रहेका छन् ।
काठमाडौँबाट छठ पर्व मनाउन सर्लाही जाँदै गरेका यात्रु सवार मधेस प्रदेश ०३–००१ ज ०८८० नम्बरको गाडी बिहीबार बिहान ६ बजेर १० मिनेटमा भीमफेदी गाउँपालिका–६ स्थित भीमफेदी–कुलेखानी सडकखण्डमा दुर्घटनामा परेको थियो । उक्त गाडी सडकबाट करिब ६०० देखि ७०० मिटर तल खसेको डीएसपी थापाले बताएका छन् ।
दुर्घटनाको सूचना प्राप्त हुनासाथ सशस्त्र प्रहरी बल, नेपाल नं. १४ गण मकवानपुरअन्तर्गत भीमफेदीस्थित कारागार सुरक्षा बेस र कुलेखानीस्थित सुरक्षा बेसबाट १९ जना सुरक्षाकर्मी उद्धारका लागि परिचालन भएका थिए । सशस्त्र प्रहरी नायब उपरीक्षक देवेन्द्रबहादुर सिंह र सशस्त्र प्रहरी सहायक निरीक्षक मनिष जैसवालको कमान्डमा उद्धार टोली घटनास्थल पुगेको थियो ।
त्यसैगरी नेपाल प्रहरी, सशस्त्र प्रहरी बलको विपद् व्यवस्थापन टोली तथा नेपाली सेनाको संयुक्त टोलीले उद्धार कार्य गरेको थियो ।b
