देशभर शिक्षकहरू आन्दोलनरत रहेको प्रभाव पर्सा जिल्लामा पनि देखिएको छ ।
सामुदायिक विद्यालयहरूमा नयाँ शैक्षिक सत्रको विद्यार्थी भर्ना अभियान ठप्प हुँदा जिल्लाभरका करिब ३५ हजार नयाँ विद्यार्थी प्रभावित भएका छन् । शिक्षा मन्त्रालयले शैक्षिक सत्र २०८१ का लागि वैशाख २ देखि ७ गतेसम्म ‘विद्यार्थी भर्ना सप्ताह’ मनाउने कार्यक्रम घोषणा गरेको थियो । तर, पर्सा जिल्लामा वैशाख १० गतेसम्म कुनै पनि सामुदायिक विद्यालयमा औपचारिक रूपमा भर्ना प्रक्रिया प्रारम्भ हुन सकेको छैन ।
पर्सा मात्रै होइन, देशैभरका सामुदायिक विद्यालयहरूमा हाल भर्ना अभियान स्थगित भएको छ । नेपाल शिक्षक महासंघले स्थायी नियुक्ति, पेशागत सुरक्षालगायतका मागहरू अघि सार्दै आन्दोलनको घोषणा गरेपछि अधिकांश शिक्षकहरू काठमाडौँमा धर्ना तथा प्रदर्शनमा छन् ।
पर्सा जिल्लामा रहेको ३ सय ५२ वटा सामुदायिक विद्यालयहरूमा १ लाख २७ हजारभन्दा बढी विद्यार्थी अध्ययनरत छन् । गत वर्ष झैँ यस वर्ष पनि करिब ३५ हजार नयाँ विद्यार्थी भर्ना हुने अनुमान गरिएको थियो । तर आन्दोलनका कारण ती विद्यार्थीको भविष्य अन्योलमा परेको अभिभावकहरूको गुनासो छ ।
यता वैशाख ७ गते वीरगंज महानगरपालिकामा आयोजित बैठकमा जिल्लाका सबै १४ वटै पालिकाका प्रमुख, उपप्रमुख तथा शिक्षा शाखा प्रमुखहरूले भर्ना अभियान वैशाख ८ देखि १५ गतेसम्म सञ्चालन गर्ने निर्णय गरेका थिए । बैठकपछि पालिकाहरूले विद्यालयहरूलाई पत्राचारसमेत गरेका थिए ।
पर्सागढी नगरपालिकाले त अनिवार्य रूपमा भर्ना अभियान सञ्चालन गर्न निर्देशन समेत दिएको थियो । तर विद्यालयहरूले निर्देशन अटेरी गरेका छन् । नगर शिक्षा शाखाका प्रमुख कपिल लामिछानेले निर्देशन कार्यान्वयन नगर्ने विद्यालय र व्यवस्थापन समितिमाथि कारबाही गरिने चेतावनी दिए पनि सो चेतावनी प्रभावकारी बन्न सकेको छैन ।
वीरगंज महानगरपालिकाका शिक्षा महाशाखा प्रमुख आनन्द लामिछानेका अनुसार शिक्षकहरूलाई आन्तरिक रूपमा तयारी गर्न भनिए पनि बाह्य रूपमा कुनै अभियान चलाइएको छैन । शिक्षकहरू आन्दोलन सकिएपछि मात्रै सक्रिय हुने संकेत दिइरहेका छन् ।
शिक्षकहरूको आन्दोलन र सरकारले देखाएको निष्क्रियताले विद्यालय तहमा गम्भीर अव्यवस्था ल्याएको देखिन्छ । शिक्षा क्षेत्रमा काम गर्ने विज्ञहरूले शिक्षक आन्दोलन त समाधानको खाँचो रहेको स्वीकार गरे पनि यसले विद्यार्थीको भविष्यमा दीर्घकालीन असर पार्न सक्ने चेतावनी दिएका छन् ।
