धनुषाको सहिदनगर नगरपालिका–५, बासुदेवपट्टीमा एकै परिवारका चार जनाको विष सेवनबाट मृत्यु भएको छ ।
सोमबार साँझ आफ्नै घरमा विष सेवन गरेकी ३० वर्षीया पविता कुमारी साहको उपचारका क्रममा शुक्बार जनकपुरधामस्थित रामजानकी अस्पतालमा निधन भएको जिल्ला प्रहरी कार्यालय धनुषाका प्रवक्ता डीएसपी वरुणबहादुर सिंहले जानकारी दिए ।
सो घटनामा पविताका तीन सन्तान — ६ वर्षीय छोरा आदित्य साह, ४ वर्षीया छोरी आकृति साह र २ वर्षीया छोरी आरुसी साहको सोमबार साँझकै समयमा मृत्यु भएको थियो ।
प्रहरीको प्रारम्भिक अनुसन्धान अनुसार घरायसी विवादकै कारण मानसिक तनावमा आएकी पविताले आफ्ना तीन सन्तानलाई विष सेवन गराई आफूले पनि विष खाएकी थिइन् । विष सेवन गरेपछि अचेत भएकी उनलाई परिवारका सदस्यहरूले तत्कालै उपचारका लागि अस्पताल पुर्याए पनि ज्यान जोगाउन सकिएन ।
पविता नौ महिनाकी गर्भवती थिइन् । विष सेवन गरेपछि चिकित्सकको टोलीले शल्यक्रिया (सी–सेक्शन) गरी गर्भमा रहेको शिशुको उद्धार गरेका थिए। नवजात शिशुको अवस्था अहिले सुधारोन्मुख रहेको अस्पताल स्रोतले जनाएको छ ।
घटनाको पृष्ठभूमि
स्थानीयबासी र प्रहरीका अनुसार पविता र उनका श्रीमानबीच घरेलु विवाद चल्दै आएको थियो । श्रीमान घरमा नभएको मौका छोपेर उनले यो भयावह कदम उठाएको प्रारम्भिक अनुसन्धानबाट खुलेको छ ।
घटनापछि शोकमा डुबेको गाउँमा आमासहित तीन सन्तानको निधनले ह्रदयविदारक अवस्था सिर्जना भएको छ ।
