नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले जनतामा बढ्दो आक्रोशलाई सरकारले समयमै सम्बोधन नगरे ठूलो जनआन्दोलनको परिस्थिति सिर्जना हुने चेतावनी दिएका छन् ।
माओवादी केन्द्रको मध्यपहाडी लोकमार्ग जागरण कार्यक्रम अन्तर्गत शुक्रबार बागलुङमा आयोजित सभालाई सम्बोधन गर्दै उनले सरकार जनताको अपेक्षा विपरीत उल्टो बाटोमा हिँडिरहेको आरोप लगाए ।
"जनतामा दिनप्रतिदिन आवेग र आक्रोश बढ्दै गएको छ, तर सरकारले गम्भीरता देखाएको छैन," प्रचण्डले भने, "यदि यो स्थितिमा सुधार आएन भने बर्खापछि ठूलो जनविद्रोहको अवस्था आउन सक्छ ।"
प्रतिपक्षी दलको हैसियतमा सरकारलाई खबरदारी गरिरहेको भन्दै उनले अझै आन्दोलनको अपिल नगरेको जनाए। तर, सरकार यही ढंगमा अघि बढे भने देशव्यापी बिद्रोह अपरिहार्य हुने चेतावनी दिए ।
पूर्वप्रधानमन्त्री समेत रहेका प्रचण्डले आफ्नो कार्यकालमा गरेका धेरै सकारात्मक कामहरू अहिलेको सरकारले उल्ट्याएको आरोप लगाए। साथै, विगतमा माओवादीले उठाएका मुद्दा राज्यले सम्बोधन नगरेकाले १० वर्षे जनयुद्धको अवस्था आएको स्मरण गराए ।
माओवादीलाई बलियो बनाउन पार्टीका नेताहरू देश दौडाहामा निस्किएको उल्लेख गर्दै उनले पार्टी सुदृढ भए भ्रष्टाचार अन्त्य गरी नयाँ आर्थिक क्रान्तिको आधारमा समाजवादको नयाँ मोडेलतर्फ देशलाई अघि बढाउने दाबी गरे ।