सर्लाहीको लालबन्दी नगरपालिका–१ स्थित पूर्वपश्चिम राजमार्गमा भन्सार छली गरिएको भारतीय नम्बर प्लेटको स्कोर्पियो गाडी र त्यसमा लुकाइएको करिब १५ लाख रुपैयाँ बराबरको अवैध सामग्री प्रहरीले बरामद गरेको छ ।
ट्राफिक प्रहरी कार्यालय नवलपुर अगाडि चेकजाँचका क्रममा बीआर ३० एके ७२२० नम्बरको स्कोर्पियो गाडीमा लुकाइछिपाई ल्याइएको सुनचाँदीका गरगहना र नगद रकमसहित गाडी नियन्त्रणमा लिइएको जिल्ला ट्राफिक प्रहरी कार्यालय, सर्लाहीले जनाएको छ ।
गाडी रोकेर चेकजाँच गर्दा चालकसँग कुनै भन्सारसम्बन्धी कागजात नभेटिएको र उनी मादक पदार्थ सेवन (मा.प.से) गरेको अवस्थामा फेला परेपछि ट्राफिक प्रहरीले अर्काे चालक बोलाएर मात्र जान दिनुपर्ने जानकारी दिएको थियो। तर, गाडीमा रहेका चार जना व्यक्ति आवश्यक कागजात र चालक ल्याउने भन्दै हिँडे पनि लामो समयसम्म नफर्किएपछि सुरक्षाको दृष्टिकोणले गाडी नियन्त्रणमा लिइएको प्रहरी निरीक्षकको टोलीले जनाएको छ ।
पछिल्लो अनुसन्धानका क्रममा जिल्ला प्रहरी कार्यालय, सर्लाही र ईलाका प्रहरी कार्यालय, लालबन्दीको संयुक्त टोलीले स्थानीय जनप्रतिनिधि र बासिन्दाको रोहवरमा गाडीको तलासी गर्दा अगाडिको इन्जिन कम्पार्टमेन्टमा प्लास्टिक र गम्छामा बेरिएको अवस्थामा सुनचाँदीका गहना फेला पारेको हो । साथै गाडीको अन्य भागहरूबाट पनि चाँदीका अन्य सामाग्री र केही नगद रकम समेत बरामद गरिएको छ ।
बरामद सामग्रीको प्रारम्भिक मूल्यांकन अनुसार करिब १५ लाख रुपैयाँ बराबरको रहेको प्रहरीले जनाएको छ । बरामद सामान र गाडीलाई भन्सार छली तथा चोरी पैठारीसम्बन्धी मुद्दामा आवश्यक कारबाहीका लागि सर्लाही भन्सार कार्यालय, मलंगवा पठाइएको छ ।
प्रहरीले फरार व्यक्तिहरूको खोजी तीव्र बनाएको जनाएको छ भने घटनाको थप अनुसन्धान जारी राखिएको छ ।
