नारायणी अस्पतालको अति संवेदनशील कक्ष आइसीयू र सिसीयू मा करिब दुई घण्टा ३० मिनेटसम्म विद्युत सेवा अवरुद्ध हुँदा पनि कुनै बिरामीको ज्यान जोगिनु ठूलो राहतको विषय बनेको छ ।
शुक्रबार राति १०:३० बजेदेखि शनिबार बिहान १:०० बजेसम्म सो अस्पतालमा विद्युत सेवा पूर्णरूपमा अवरुद्ध भएको थियो। यस समयमा आइसीयू र सिसीयूमा १७ जना बिरामी उपचाररत थिए। विद्युत आपूर्ति अवरुद्ध भएपछि चिकित्सक र नर्सहरूले मोबाइलको बत्ती बालेर उपचार जारी राखेका थिए ।
अस्पताल प्रशासनको लापरवाहीका कारण विद्युत आपूर्तिमा अवरोध आएको बताइएको छ । जिल्ला प्रशासन कार्यालय पर्साले घटनालाई गम्भीर रूपमा लिएको छ । प्रमुख जिल्ला अधिकारी गणेश अर्याल र पर्साका प्रहरी प्रमुख गौतम मिश्रले शनिबार अस्पताल प्रशासन, विकास समिति, मेडिकल सुपरिटेन्डेन्ट, चिकित्सक, नर्सिङ स्टाफ र प्राविधिकहरूसँग बैठक गरी आवश्यक निर्देशन दिएका छन् ।
प्रजिअ अर्यालले भने, “अस्पतालको अति संवेदनशील क्षेत्रमा यति लामो समय विद्युत अवरुद्ध हुनु गम्भीर लापरवाही हो । यदि बिरामीको ज्यान गएको भए त्यसको जिम्मा कसले लिने थियो ?” उनले यस्ता घटना दोहोरिन नदिन चेतावनीसहित निर्देशन दिएका छन् ।
प्रहरी प्रमुख मिश्रले अस्पतालमा २४ घण्टा इलेक्टिसियन खटाउन आग्रह गर्दै, यस्तो संवेदनशील ठाउँमा प्राविधिकहरूको उपस्थितिको अनिवार्यता औंल्याए ।
नारायणी अस्पताल विकास समितिका अध्यक्ष धिरजकुमार गुप्ताले भविष्यमा यस्ता लापरवाही हुन नदिने प्रतिबद्धता व्यक्त गरे। अस्पतालका निमित्त मेडिकल सुपरिटेन्डेन्ट डा. चित्ररञ्जन साहले कमजोर वायरिङकै कारण समस्या आएको र त्यसलाई तत्काल सुधार गरिने बताए ।
उनका अनुसार, आइसीयूमा रहेका दुई जना गम्भीर बिरामीलाई अर्को अस्पताल स्थानान्तरण गर्ने तयारी भइरहेको समयमा पुनः विद्युत सेवा बहाल भएपछि स्थानान्तरण गर्नु परेन ।
