तहट प्रहरीले लागुऔषध ओसारपसारको आरोपमा दुईजनालाई पक्राउ गरेको छ । पक्राउ परेकालाई बिहीबार जिल्ला प्रहरी कार्यालयले सार्वजनिक गरेको हो ।
लागूऔषध नियन्त्रण ब्युरो शाखा वीरगन्ज र जिल्ला प्रहरी कार्यालय रौतहटको संयुक्त टोलीले बुधबार राति गौर नगरपालिका–१ स्थित शुभम होटलअगाडि भारतीय नम्बर प्लेट ९बिआर ०५ यू ५८६०० भएको ग्लामर मोटरसाइकलमा आएका दुईजनालाई नियन्त्रणमा लिएको हो । पक्राउ पर्नेमा राजदेवी नगरपालिका–८ लक्ष्मीपुरका २३ वर्षीय नितेशकुमार पण्डित र ३२ वर्षीय पिन्टुकुमार यादव छन् ।
प्रहरी निरीक्षक रामकुमार महतोको टोलीले गोप्य सूचनाका आधारमा उनीहरूमाथि निगरानी बढाएको थियो । शंका लागेपछि चेकजाँच गर्दा उनीहरूकै साथमा कालो प्लास्टिकको झोलामा लुकाइराखिएको अवस्थामा लागुऔषध फेला परेको जिल्ला प्रहरी कार्यालयका डिएसपी दिपककुमार रायले जानकारी दिए ।
पक्राउ परेकाहरूको साथबाट प्रहरीले नाईट्रोभेट, नेटजेकेयर, डाइजोपाम, फेनारगन लगायतका इन्जेक्सन बरामद गरेको छ । ती सबै औषधिहरू नेपालमा प्रतिबन्धित र भारतमा मात्र पाइने खालका हुन् ।
प्रहरीले पक्राउ परेकाहरूलाई नियन्त्रणमा राखेर थप अनुसन्धान अघि बढाएको जनाएको छ । पछिल्लो समय रौतहटको सीमावर्ती क्षेत्रमा लागुऔषध ओसारपसारको गतिविधि बढ्दै गएको प्रहरीको भनाइ छ ।
