जनकपुरधाम | पानीको अभावले खडेरी र सुक्खाग्रस्त बनेका किसानलाई राहत दिन मधेस प्रदेश सरकारले १८ करोड रुपैयाँ बजेटमा स्यालो ट्युबवेल वितरण कार्यक्रम सुरु गरेको छ ।
भूमि व्यवस्था, कृषि तथा सहकारी मन्त्रालयले "सुक्खाक्षेत्र सहयोग कार्यक्रम" अन्तर्गत प्रदेशका आठ जिल्लाका किसानहरूलाई स्यालो ट्युबवेल वितरण गर्न थालेको हो ।
आठ जिल्लाका किसानलाई लक्षित
कार्यक्रम अन्तर्गत धनुषा, महोत्तरी, सर्लाही, रौतहट, बारा, पर्सा, सिरहा र सप्तरी जिल्लामा खडेरीको चपेटामा परेका किसानलाई स्थानीय कृषि ज्ञान केन्द्रमार्फत ट्युबवेल वितरण गरिएको मन्त्रालयका प्रवक्ता सरोज चौधरीले जानकारी दिए ।
उनका अनुसार जनताको आवश्यकता र प्राथमिकताको आधारमा १२ सय स्यालो ट्युबवेल वितरण गरिने छ ।
लागत र प्रक्रिया
मन्त्रालयको अनुमानमा, एउटा स्यालो ट्युबवेल जडान गर्न रू. १ लाखदेखि ३ लाखसम्म खर्च हुने देखिएको छ ।
यदि ट्युबवेलमा सोलार प्रणाली समेत जडान गरिने हो भने थप खर्च हुने प्रवक्ता चौधरीले बताए। खर्चको परिमाण पानीको गहिराईमा निर्भर रहनेछ ।
ट्युबवेल पाउन आवश्यक कागजात
स्यालो ट्युबवेल लिन चाहने किसानले कम्तीमा दुई बिघा खेतीयोग्य जमिन भएको प्रमाणित लालपुर्जा कृषि ज्ञान केन्द्रमा पेश गर्नुपर्ने व्यवस्था गरिएको छ ।
यसका लागि मन्त्रालयले ७ दिनको सूचना जारी गरिसकेको छ ।
५० प्रतिशत मात्रै धान रोपाइँ
मधेस प्रदेशमा हालसम्म पानीको अभावका कारण करिब ५० प्रतिशत मात्रै धान रोपाइँ भएको मन्त्रालयले जनाएको छ ।
