पर्सा | जगरनाथपुर गाउँपालिकाले खाली पर्ती, खोलाको बगर, वर्षौदेखि उपयोगविहीन ऐलानी लगायतका सार्वजनिक जग्गामा वृक्षारोपण अभियानलाई तिव्रता दिएको छ ।
यसै क्रममा, वडा नम्बर २ दशौंतास्थित नदीको बगरमा रहेका करिब १० बिघा जग्गामा शुक्रबार वृक्षारोपण गरिएको हो । वर्षौदेखि प्रयोगविहीन रहेको सो बगर क्षेत्रमा अमला, आँप, लिची, कटहर, जामुन, कदम, पिपल, बर, मसला, खयरलगायत २७ प्रजातिका १० हजारभन्दा बढी विरुवा रोपिएको गाउँपालिका अध्यक्ष श्रीकान्त प्रसाद यादवले जानकारी दिनुभयो ।
वृक्षारोपण कार्यक्रमको उद्घाटन पूर्व उद्योग, वाणिज्य तथा आपूर्ती मन्त्री रमेश रिजालले गर्नुभएको थियो । अध्यक्ष यादवको अध्यक्षतामा सम्पन्न कार्यक्रममा प्रदेश सभा सदस्य शंकर चौधरी, गाउँपालिकाकी उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश यादव, वडाध्यक्षहरू नेपाली, सुभाष यादव, बिहारी महतो नुनिया, नेपाली कांग्रेसका नेता वशीष्ठनारायण कुर्मी तथा स्थानीयवासीको उत्साहजनक सहभागिता थियो ।
यसअघि, गत वर्ष वडा नम्बर २ दशौताकै रैनीझैनी मठको अतिक्रमित १५ बिघा ऐलानी जग्गा अतिक्रमणमुक्त गरी त्यहाँ ७ हजारभन्दा बढी विरुवा रोपिएको थियो । त्यस्तै, वडा नम्बर ४ सुहपुर–सोहरीमा खोलाछेउको ऐलानी ९ बिघा जग्गामा १० हजारभन्दा बढी विरुवा रोपिएको र ती विरुवाहरू हुर्किएर अहिले घना जंगलजस्तै बनेको अध्यक्ष यादवले बताए ।
वृक्षारोपण अभियानलाई प्राथमिकतामा राखेको जगरनाथपुर गाउँपालिका हालै संघीय सरकारको वन तथा वातावरण मन्त्रालयबाट नगदसहित पुरस्कृत भएको थियो । वन तथा वातावरण संरक्षणमा देशभर उत्कृष्ट कार्य गरेको भन्दै गत असार ३० गते बबरमहलस्थित रेड कार्यान्वयन केन्द्रमार्फत गाउँपालिकालाई प्रथम पुरस्कारस्वरूप १ लाख २५ हजार रुपैयाँ प्रदान गरिएको हो ।
अध्यक्ष यादवले जनप्रतिनिधि निर्वाचित भएदेखि नै वृक्षारोपणलाई मुख्य प्राथमिकता दिएको उल्लेख गर्दै मधेसमा बढ्दो सुख्खा र खडेरीको दीर्घकालीन समाधानका लागि वन संरक्षण अपरिहार्य रहेको बताए । उनले रोपिएका विरुवाको संरक्षणका लागि घेराबारसमेत गरिएको उल्लेख गर्दै, “जहाँ जहाँ वृक्षारोपण गरेका छौं, अहिले त्यहाँ गएर हेर्दा विरुवा हुर्किएर जंगलजस्तै देखिन्छ,” भने ।
भिडियाे सामाग्री
