नेपाल आयल निगमले डिजेल र मट्टीतेलको मूल्य घटाएको छ । इण्डियन आयल कर्पोरेशनले मूल्य समायोजन गरेर पठाएपछि निगमले खुद्रा मूल्यमा हेरफेर गरेको हो ।
निगमका अनुसार डिजेल र मट्टीतेलको खुद्रा बिक्री मूल्य प्रतिलिटर ४ रुपैयाँले घटाइएको छ । तर पेट्रोल र एलपी ग्यासको खुद्रा बिक्री मूल्य भने यथावत राखिएको छ ।
यस्तै हवाई इन्धनमा आन्तरिकतर्फ प्रतिलिटर १ रुपैयाँले घटाइएको छ भने अन्तर्राष्ट्रिय उडानतर्फ काठमाडौंका लागि प्रतिकिलो लिटर ७ अमेरिकी डलरले सस्तो भएको निगमले जनाएको छ ।
पोखरा र भैरहवाबाट हुने अन्तर्राष्ट्रिय उडानका लागि भने ब्रेकइभेन पोइन्ट मूल्य कायम गरिएको छ । नयाँ मूल्य सोमबार राति १२ बजेदेखि लागू हुने निगमले जनाएको छ ।
